इरानविरुद्ध अमेरिकाले हमला गर्ने नगर्ने भन्नेमा ट्रम्पले दुई सातामा निर्णय लिने

breaking news

- न्यूज नेपाल

काठमाडौं । इजरायल-इरान युद्ध चलिरहेको बेला अमेरिकाले के गर्ला ? अहिले यो विषय प्रमुख चासोको रुपमा देखिएको छ ।

इरानमाथि आणविक कार्यक्रम रोके सैन्य कारबाही नगर्ने चेतावनी दिदै आएका अमेरिकी राष्ट्रपति डोनाल्ड ट्रम्पले अझैं दुई सातापछि मात्रै इरानमाथि हस्तक्षेप गर्ने वा नगर्ने भन्ने विषयमा निर्णय लिने भएका छन् ।

ह्वाइट हाउसले बिहीबार आयोजना गरेको नियमित पत्रकार भेटघाटमा ह्वाइट हाउसकी प्रेस सेक्रेटरीले राष्ट्रपति ट्रम्पले अर्को दुई हप्ताभित्र इरानमाथि अमेरिकी सैन्य हमला गर्ने वा नगर्ने निर्णय गर्ने बताएकी हुन् ।

अमेरिकी सैन्य कारबाहीको बारेमा अन्तिम निर्णय गर्नुअघि कूटनीतिक प्रयासहरू बढाउने चाहानास्वरुप यो निर्णय गरिएको उनले बताएको बीबीसीले उल्लेख गरेको छ ।

“निकटभविष्यमा इरानसँग वार्ता हुने सम्भावनाको आधारमा, म अर्को दुई हप्ताभित्र हमला गर्ने वा नगर्ने निर्णय गर्नेछु,” राष्ट्रपति ट्रम्पको वक्तव्यमा उल्लेख छ ।

ट्रम्पको यो वक्तव्य प्रेस सेक्रेटरी क्यारोलिन लेभिटले ह्वाइट हाउसको नियमित पत्रकार अन्तक्र्रियामा पढेर सुनाइन् ।

युरोपेली कूटनीतिज्ञहरूले तनाव कम गर्न आग्रह गरेका छन् । इरानले अमेरिकी संलग्नताले क्षेत्र नष्ट गर्ने चेतावनी दिएको छ । ट्रम्पको निर्णय इरानले युरेनियम समृद्धि छोड्छ वा छोड्दैन भन्नेमा निर्भर गर्छ ।