बाढीले रसुवा गढीको मितेरी पुल र दर्जनौँ गाडी बगायो

रसुवागढी हाइड्रोपावर र क्याम्पमा क्षति

breaking news

काठमाडौँ । बाढीपहिरोले रसुवागढीको मितेरी पुल र दर्जनौँ गाडी बगाएको छ । भीषण वर्षासँगैको बाढी र पहिरोका कारण नेपाल–चीन जोड्ने मितेरी पुल बगाएको हो । रसुवाका प्रमुख जिल्ला अधिकारी अर्जुन पौडेलले गएरातिको बाढीले पुल बगाएको केही सञ्चारमाध्यमसँग पुष्टि गरेका छन् । यससँगै रसुवा हुँदै चीनसम्मको मार्ग बिच्छेद भएको छ ।

यस्तै भन्सारको यार्ड (ड्राइपोट) मा रहेका १०० देखि १५० वटा गाडीमध्ये अधिकांश बाढीले बगाएको जानकारी आएको समेत उनले मंगलबार बिहान सञ्चारमाध्यमलाई बताए ।

उनले ड्राइपोटमा काम गर्ने केही ड्राइभर, लेबर (मजदुर) लाई पनि बाढीले बगाएको हुनसक्ने भन्दै जानकारी आएको भएपनि हालसम्म पुष्टि भने हुन नसकेको बताए ।उनले समग्रमा क्षति ठूलो भएको भन्दै घटनास्थलमा पुगेर क्षतिको थप विवरण र सूचना संकलन गर्ने काम भइरहेको बताए ।

भोटेकोशी नदीमा आएको बाढीले रसुवागढी हाइड्रोपावरको ड्याम र क्याम्पमा क्षति पुर्‍याएको छ। प्रशासन प्रमुख टीकानाथ पौडेलले ठूलो क्षति भएको अनुमान गरे र कर्मचारीहरु विस्थापित भएर जंगलमा बसिरहेको बताए।