बेलायतले इरानबाट अप्रत्याशित खतराको सामना गर्दै : अध्ययन प्रतिवेदन

breaking news

लण्डन । बेलायतले इरानबाट बढ्दो र अप्रत्याशित खतराको सामना गरिरहेको एक प्रतिवेदनले चेतावनी दिएको छ । बेलायतले इरानबाट खतराको सामना गरिरहेको र सरकारले यसको सामना गर्न अझ बढी कदम चाल्नुपर्ने संसद्को गुप्तचर तथा सुरक्षा समितिलाई उद्धृत गर्दै बीबीसीले जनाएको छ ।

बेलायतले इरानी राज्य हत्या र अपहरण, जासुसी, साइबर आक्रमण र देशको आणविक कार्यक्रमको जाँच गर्ने प्रमुख अनुसन्धानको नतिजा प्रकाशित गर्दैगर्दा प्रतिवेदनले चेतावनी दिएको हो ।

बेलायतको जासुसी एजेन्सीहरूको निरीक्षण गर्ने जिम्मेवारी पाएको समितिले बेलायतमा इरानी शासनका विरोधीहरूविरुद्ध देखा परेका भौतिक सुरक्षा खतराहरूमा तीव्र वृद्धि भएकोमा विशेष चिन्ता व्यक्त गरेको खबरमा उल्लेख छ ।

इरानले बेलायत, बेलायती नागरिक र बेलायती हितका लागि व्यापक, निरन्तर र अप्रत्याशित खतरा निम्त्याएको समितिका अध्यक्ष लर्ड बिमिशले बताउनुभएको छ ।

सन् २०२२ को शुरुआतदेखि यता बेलायती नागरिक वा बेलायतमा बस्ने व्यक्तिहरूविरुद्ध कम्तीमा १५ वटा हत्या वा अपहरणको प्रयास भएको प्रतिवेदनमा उल्लेख छ ।