एअर इन्डिया विमान दुर्घटनाको प्रारम्भिक प्रतिवेदन सार्वजनिक

नयाँ दिल्ली । एअर इन्डिया फ्लाइट १७१ को दुर्घटनासम्बन्धी प्रारम्भिक प्रतिवेदन सार्वजनिक भएको छ । रिपोर्टअनुसार अहिले सम्म बोइङ ७८७ ड्रीमलाइनर र त्यसमा प्रयोग भएको इन्जिनको अपरेटरहरूलाई कुनै सल्लाह जारी गरिएको छैन । १२ जुन २०२५ मा भारतको अहमदाबाद शहरमा एअर इण्डियाको बोइङ ७८७–८ ड्रीमलाइनर दुर्घटनाग्रस्त भएको थियो । यस दुर्घटनामा विमानमा सवार सबै २०४ जनाको ज्यान गएको थियो भने पाँच वटा भवनहरू पूर्ण रूपमा ध्वस्त भएका थिए । मेडिकल होस्टेलमा ठोक्किँदा करिब ३० जना भुइँतलामा रहेका व्यक्तिहरूको पनि ज्यान गएको थियो ।

दुवै इन्जिनको फ्युल कन्ट्रोल स्वीचहरू ‘रन’बाट ‘कट–अफ’ मा सारिएको पुष्टि भएको छ । सामान्यतया यस्तो प्रक्रिया विमान गन्तव्यमा अवतरणपछि मात्र गरिन्छ । तर कुनै आपतकालीन अवस्था रिपोर्टमा उल्लिखित छैन । इन्जिन १ ले केही पुनः गति लिन थालेको देखिए पनि इन्जिन २ को गति घट्ने प्रक्रिया रोकिन सकेन । यद्यपि एउटा इन्जिनले रिस्टार्ट गर्न सके पनि विमानको गतिको घट्दो अवस्था नियन्त्रणमा आउन सकेन । फ्लाइटमा भरेको इन्धनको नमुना परीक्षण ‘सन्तोषजनक’ पाइएको छ ।

दुर्घटनाअघि चालकदल र पाइलटहरूले ब्रेथलाइजर परीक्षणसमेत गराएका थिए जसमा उनीहरू सबै ‘उडान सञ्चालनका लागि योग्य’ प्रमाणित भएका थिए । अहिलेको प्रारम्भिक अनुसन्धान अनुसार विमानको कुनै यान्त्रिक दोष वा सफ्टवेयर त्रुटिको पुष्टि भएको छैन । सम्पूर्ण निष्कर्ष आउन अझै समय लाग्ने देखिएको छ ।

यसैबीच एअर इन्डियाले यस विषयमा विज्ञप्ति जारी गर्दै पीडित परिवारप्रति ऐक्यबद्धता जनाएको छ । एअरलाइन्सले अनुसन्धानमा पूर्ण सहयोग गरिरहेको र रिपोर्टका विषयमा अहिले थप प्रतिक्रिया दिन नसक्ने जनाएको छ । सरकारको नागरिक उड्डयन मन्त्रालयका अनुसार विमान दुर्घटनाको अनुसन्धान भारतको विमान दुर्घटना अनुसन्धान ब्यूरो (एएआईबी) ले गरिरहेको छ ।

Comments