नेपाल र कुवेतबीच वार्षिक क्रिकेट शृंखला आयोजना हुने

breaking news

- न्यूज नेपाल

काठमाडौं । नेपाल र कुवेतबीच वार्षिक क्रिकेट शृंखला आयोजना हुने सम्झौता भएको छ। अन्तर्राष्ट्रिय क्रिकेट परिषद् (आईसिसी)को सिंगापुरमा सम्पन्न वार्षिक सम्मेलनमा नेपाल र कुवेतबिच यस्ताे सम्झाैता भएको हो।

नेपाल क्रिकेट संघ (क्यान) र कुवेत क्रिकेट बोर्डबीच सन् २०२६ देखि पुरुष तथा महिला दुवै टोलीका लागि वार्षिक रूपमा कम्तीमा तीन टी–२० अन्तर्राष्ट्रिय (टी–२०आई) र थप ५० ओभरका खेलहरू आयोजना गर्ने ऐतिहासिक साझेदारी भएको हाे ।

यो सम्झौता अनुसार, दुवै देशले प्रत्येक वर्ष एक–अर्काको भूमिमा क्रिकेट शृंखला खेल्नेछन्। क्यानले मंगलबार जारी गरेको एक विज्ञप्तिमा भनिएको छ,

“यो साझेदारीले एसियाभरि क्रिकेटको वृद्धि र विकासमा एउटा प्रमुख कोसेढुंगा साबित हुनेछ। वार्षिक शृंखला एसोसिएट क्रिकेट क्यालेन्डरमा एक महत्वपूर्ण स्थान बनाउने र पारस्परिक विकास तथा उत्कृष्टताका लागि एउटा मञ्च बन्नेछ ।”

यो साझेदारीको महत्व अझ बढ्छ किनभने नेपाल र कुवेत दुवै आगामी अक्टोबरमा ओमानमा आयोजना हुने आईसिसी पुरुष टी–२० विश्वकप २०२६ एसिया क्षेत्रीय छनोटमा जापानसहित एउटै समूहमा रहेका छन्। यसले आगामी वर्षहरूमा दुई देशबीचको क्रिकेट प्रतिस्पर्धालाई थप रोमाञ्चक बनाउने निश्चित छ।