१२औं विश्व स्ट्रेन्थ लिफ्टिङ एन्ड आईबीपीमा दुई कीर्तिमान बनाउँदै नेपाल तेस्रो

काठमाडौं । थाईल्याण्डको पटायामा १६ देखि १९ जुलाई २०२५ सम्म आयोजित १२औं विश्व स्ट्रेन्थ लिफ्टिङ एन्ड आईबीपी च्याम्पियनसिपमा नेपालले दुई विश्व कीर्तिमान बनाएर इतिहास रच्दै तेस्रो स्थान हासिल गरेको छ । ९ जना खेलाडीहरूको दमदार प्रदर्शनले नेपाललाई ७ स्वर्ण, ५ रजत र २ कांस्यसहित कुल १४ पदक दिलाउँदै अन्तर्राष्ट्रिय मञ्चमा गौरवपूर्ण उपस्थिति दिलाएको छ।

करण बाडियाद्वारा विश्व कीर्तिमानसहित स्वर्ण

पुरुष सिनियर ६० केजी तौल समूहमा करण बाडियाले इन्क्लाइन बेन्च प्रेस (आईबीपी) मा रजत जिते भने स्ट्रेन्थ लिफ्टिङ (हेक लिफ्ट) मा स्वर्ण पदक जित्दै २२० केजी वजन उठाएर नयाँ विश्व कीर्तिमान कायम गरे। उनको प्रदर्शनले प्रतियोगितामा नेपालको हैसियत थप मजबुत बनाएको छ। पुरुषतर्फ अन्यले शानदार प्रदर्शन गरे। सिनियर ६८ केजीमा मोहित गुप्ताले आईबीपीमा स्वर्ण हात पार्दा हेक लिफ्टमा कास्य जिते । मास्टर-१ समूहमा सानू कान्छा लामाले दुवै विधा आईबीपी र हेक लिफ्टमा रजत पदक ल्याए । मास्टर-२ तर्फ केदारमान स्थापितले आईबीपीमा स्वर्ण जित्दा सन्तोष काजी शाक्य रजत र राजेश श्रेष्ठ कास्य पदक विजेता बने । मास्टर-३ समूहमा कृष्ण सिंह शाहीले आईबीपीमा रजत र हेक लिफ्टमा स्वर्ण जित्दै नेपाली टीमको पदक तालिकामा थप योगदान गरे ।

अमृता खड्काले बनाए नयाँ विश्व कीर्तिमान

प्रतियोगितामा महिला खेलाडीहरूको प्रदर्शन उच्च रह्यो । सिनियर ५८ केजीमा अमृता खड्काले ७२.५ केजी वजन उठाउँदै नयाँ विश्व कीर्तिमान बनाउँदै आईबीपी र हेक लिफ्ट दुवैमा स्वर्ण जितिन् । उनले “हेक लिफ्ट च्याम्पियन अफ च्याम्पियन कप” पनि जितिन्, जुन प्रतियोगिताको विशेष उपाधि हो । त्यसैगरी सिनियर +८० केजी वर्गमा दीपा विष्टले आईबीपीमा स्वर्ण पदक जित्दै महिला ओभरअल च्याम्पियन बन्न सफल भइन् ।

टिम इभेन्ट्समा नेपाल तेस्रो

व्यक्तिगत सफलतासँगै टिम इभेन्टतर्फ पनि नेपालले तेस्रो स्थान हासिल गर्दै सम्पूर्ण प्रतियोगितामा आफ्नो सशक्त उपस्थिति जनायो । १४ पदकसहितको यो ऐतिहासिक सफलताले नेपाललाई अन्तर्राष्ट्रिय स्ट्रेन्थ लिफ्टिङ्गको नक्शामा अझ मजबुत रूपमा उभ्याएको छ ।

Comments