सर्वोच्चका वरिष्ठतम न्यायाधीश फुयालसहित तीन न्यायाधीश सम्मानित

काठमाडौं । दोलखा कानुन व्यवसायी समाजले तीन जना सर्वोच्च अदालतका न्यायाधीशलाई सम्मान गरेको छ। भीमेश्वर नगरपालिका घर भएका पूर्वन्यायाधीश बलराम केसी, तामाकोसी गाउँपालिका–६ च्यामा पुर्खौली घर भएका सर्वोच्चका बहालवाला न्यायाधीश हरिप्रसाद फुयाल, र जफे घर भएका न्यायाधीश मेघराज पोखरेललाई यस अवसरमा सम्मान गरेका हुन ।

कार्यरत न्यायाधीश हरिप्रसाद फुयालले आफूप्रतिको विश्वास कायम राख्दै न्यायालयको प्रतिष्ठामा कुनै पनि प्रकारको आँच नआउने गरी काम गर्नेमा जोड दिए ।

न्यायाधीश फुयालका पूर्वज चार पुस्ताअघि दोलखाबाट संखुवासभा गएको थियो । त्यसपछि फुयाल परिवार म‍ोरङ झरेको ह‍ो।

पुस्तौली थातथलोका कानून क्षेत्रका व्यक्तित्वहरूसँग भेटघाट एवं सम्मानप्रति न्यायाधीश फुयालले खुसी व्यक्त गरेका थिए।

सर्वोच्चमा नवनियुक्त न्यायाधीश मेघराज पोखरेलले सर्वोच्च अदालतमा काम गर्ने चुनौतीपूर्ण जिम्मेवारी आएको बताउँदै त्यसप्रति पूर्ण रूपमा जिम्मेवार भएर उल्लेखनीय योगदान गर्ने प्रतिबद्धता व्यक्त गरे। उनले न्यायिक क्षेत्रको प्रतिष्ठा उच्च बनाउन आफूले सक्दो प्रयास गर्ने पनि बताए।

कार्यक्रममा पूर्वमहान्यायाधिवक्ता मुक्ति प्रधान, वरिष्ठ अधिवक्ता लक्ष्मीप्रसाद उप्रेती, सुभद्रा सिटौला र अधिवक्ता प्रवीण प्रधानले दोलखा जिल्लाबाट न्यायालयको सर्वोच्च तहमा पुग्ने कानुन व्यवसायीहरू प्रति गर्व गर्दै उनीहरूको सफलता कानून क्षेत्रमा नयाँ प्रेरणा भएको बताए।

कार्यक्रममा पूर्वन्यायाधीश बलराम केसीले सर्वोच्च अदालतको संवैधानिक इजलासमा जेष्ठताको आधारमा नभई विज्ञताको आधारमा न्यायाधीश राख्नुपर्ने धारणा राखेका थिए।

दोलखा कानुन व्यवसायी समाजका उपाध्यक्ष सहदेव पाण्डेले ‘संस्थाको उद्देश्य दोलखा जिल्लामा घर भएकाहरूलाई एकीकृत गरी सकारात्मक पहल र सहयोगमार्फत कानून क्षेत्रलाई अझ सशक्त बनाउनु’ रहेको बताए। उनले आगामी दिनमा पनि समाजले यस किसिमका कार्यक्रमहरू गर्दै न्यायिक क्षेत्रमा थप योगदान पुर्‍याउने बताए।

यो सम्मान समारोहले दोलखाली कानुन व्यवसायीहरूलाई थप प्रोत्साहन दिने विश्वास गरिएको छ।

Comments