यू–२० महिला एसियन कप छनोटमा नेपाल आज भुटानसँग खेल्दै

Blog

- न्यूज नेपाल

काठमाडाैं । एएफसी यु–२० महिला एसियन कप छनोटको समूह ‘ए’ आजदेखि भुटानको थिम्पुमा सुरु हुँदैछ।

नेपालले पहिलो खेलमा घरेलु टोली भुटानसँग प्रतिस्पर्धा गर्नेछ। खेल थिम्पुस्थित चाङलिमियाङ स्टेडियममा साँझ पौने ६ बजे सुरू हुनेछ।

यस समूहमा नेपाल, भुटान, उत्तर कोरिया र साउदी अरब रहेका छन्। मङ्गोलिया भने प्रतियोगिताबाट नाम फिर्ता लिइसकेको छ। उत्तर कोरिया यसअघि एएफसी एसियन कप च्याम्पियन बनेको टोली हो।

नेपालले समूह उपविजेता बन्ने लक्ष्य लिएको छ। ३२ राष्ट्र सहभागी छनोट प्रतियोगितामा आठ समूह छन्। समूह विजेता आठ टोली र उत्कृष्ट तीन उपविजेता टोलीले २०२६ मा थाइल्यान्डमा हुने यु–२० महिला एसियन कपमा स्थान बनाउने छन्।

नेपालले हालै बङ्गलादेशमा सम्पन्न साफ यु–२० महिला च्याम्पियनसिपमा उपविजेता स्थान हासिल गरेको थियो। उक्त प्रतियोगितामा नेपालले भुटानलाई दुई खेलमा ६–१ र ८–० ले पराजित गरेको थियो।

नेपालका प्रशिक्षक यामप्रसाद गुरुङले टिमको तयारी राम्रो रहेको बताउँदै छनोट चरण पार हुनेमा विश्वास व्यक्त गरे। उनले भुटानलाई घरेलु टोलीका रूपमा कमजोर नठानिएको स्पष्ट पार्नुभयाे। कप्तान बिर्सना चौधरीले सबै टोलीलाई ध्यानमा राखी तयारी गरेको बताए।

भुटानकी प्रशिक्षक टङ्कमाया घलेले नेपालविरुद्ध सकारात्मक उर्जाका साथ उत्रने बताउँदै दुई नयाँ खेलाडीलाई टिममा समावेश गरिएको जानकारी दिए। कप्तान सोनाम छोमोले उत्तर कोरियालाई बलियो टोली माने पनि घरेलु मैदानमा उत्साहित रहेको भनाइ राखे।

उत्तर कोरियाका प्रशिक्षक री सोङ होले भुटानको उच्च भू-उचाइले टिमलाई असर गर्न सक्ने बताए। साउदी प्रशिक्षक जेभियर भिलामालले मौसमसँग अभ्यस्त हुन टिमलाई २० दिनअघि नै भुटान ल्याइएको जानकारी गराए।