इजरायली राष्ट्रपतिसँग विपिन जोशीकी आमा र बहिनीको भेट

breaking news

- न्युज नेपाल

काठमाडाैं । प्यालेस्टिनी लडाकु समूह हमासको अपहरणमा परेका कञ्चनपुरका विपिन जोशीकी आमा र बहिनीले इजरायली राष्ट्रपति आइज्याक हर्जोगलाई भेटेका छन् ।

नेपालको इजरायलस्थित राजदूत धनप्रसाद पण्डितको पहलमा जोशीकी आमा र बहिनीले आइतबार राष्ट्रपति आइज्याकसँग भेटवार्ता गरेका हुन् ।

भेटका क्रममा इजरायली राष्ट्रपतिसँग विपिनकी आमाले छोराको शीघ्र रिहाइका लागि पहल गरिदिन आग्रह गरेकी थिइन् । जवाफमा इजरायली राष्ट्रपति हर्जोगले विपिनको रिहाइका लागि कोसिस भइरहेको जानकारी गराएका थिए ।

सुदूरपश्चिम विश्वविद्यालयको कृषि सङ्कायमा अध्ययनरत ४९ विद्यार्थी ‘लर्न एन्ड अर्न’ कार्यक्रमअन्तर्गत इजरायल गएका थिए । त्यहाँ गएको एक महिना नहुँदै वि.सं. २०८० असोज २० गते इजरायलको दक्षिणी क्षेत्रस्थित अलिमुम किबुजमा हमास समूहले आक्रमण गरेको थियो ।

आक्रमणमा १० नेपालीसहित १ हजार २०० जनाको ज्यान गएको थियो भने एक सय २९ जना नागरिकलाई विदेशी नागरिकलाई बन्धक बनाएर राखेको थियो । बन्धक हुनेमा विपिन जोशी पनि थिए । त्यति बेलादेखि विपिनको अवस्था अज्ञात छ ।

हाल विपिनको परिवार, विशेषगरी उनकी आमा र बहिनी विपिनको सकुशल रिहाइका लागि इजरायलको तेल अभिभमा रहेको ‘होष्टेज स्क्वायर’ मा पुगेर अन्तर्राष्ट्रिय समुदायसँग सहयोगको याचना गरिरहेका छन् ।