बैंककमा हरितालिका–तीजको रौनक, १० हजारभन्दा धेरै महिलाको सहभागिता

बैंकक । थाइल्यान्डको राजधानी बैंककमा १० हजारभन्दा धेरै महिलाको सहभागितामा विभिन्न कार्यक्रम गर्दै तीज विशेष कार्यक्रम सम्पन्न भएको छ । थाई नेपाली संघ बैंकक शाखा महिला विभागको आयोजनामा आइतबार (अगस्ट २४ तारिख) भएको कार्यक्रममा तीज गीतमा नाचगान गर्दै मिठो–मिठो खानेकुरा खाएर रमाइलो गरियो । यस्तै कार्यक्रममा नृत्यलगायत विभिन्न प्रतियोगिता भयो र विजेताहरुलाई पुरस्कार प्रदान गरियो ।

नाचगान र खानपिनसँगै विभिन्न व्यक्तित्वहरुले मन्चमा तीज पर्व र यसको महत्व सम्बन्धमा विचार राखेका थाइ नेपाली संघका पूर्वअध्यक्ष एवम् वर्तमान संरक्षक कुमार कार्कीले न्यूज नेपाल डटकमलाई जानकारी दिनु भयो । कार्यक्रमको प्रमुख अतिथि थाइल्यान्डका लागि नेपाली आवासीय राजदूत धनबहादुर वलीकी धर्मपत्नी मिना ओली र थाइ सरकारका तर्फबाट उपगर्भनर सुन्थन छाट रहनु भएको थियो । तीज विशेष कार्यक्रम सफल बनाउन थाइ नेपाली संघ बैंकक शाखा अन्तर्गतका विभिन्न आठवटा उपशाखाहरुको सक्रियता रहेको थियो ।

कार्यक्रममा बैंककस्थित राजदूतावास, एनआएनए, एनसीसी लगायत विभिन्न संघसंस्था तथा कार्यालयका पदाधिकारी,प्रतिनिधिलगायतको विशेष उपस्थिति थियो । विभिन्न संघसंस्थामा आबद्ध दाजुभाईहरुले दिदीबहिनीहरुलाई दर खुवाउनु भयो ।

थाइ नेपाली संघ बैंकक शाखा महिला विभागकी प्रमुख संगीता कार्कीको अध्यक्षता भएको कार्यक्रममा प्रमुख अतिथि ओली र उपगर्भनर सुन्थन, एनआरएन एनसीसी थाइल्यान्डको वूमन को-अर्डीनेटर, थाइ नेपाली संघकी पूर्वअध्यक्ष एवम् वर्तमान संरक्षक वासना राईलगायतले मन्तव्य राखे । उनीहरुले तीज पर्व सांस्कृतिक एकता पर्व भएको जनाए ।

तिज विशेष कार्यक्रममा भाग्य चिठ्ठा खेलाइएको थियो । चिठ्ठामा एक लाख , ५० हजार, ३० हजार र २० हजार भाट पैसा पुरस्कार राखिएको थियो । यस्तै ‘मिसेज तीज’ प्रतियोगिताका विजेताहरुलाई नगदसहित पुरस्कृत गरियो । यसैगरी नृत्य प्रतियोगितामा प्रथम, दोस्रो र तेस्रो स्थान हासिल गर्नेलाई पनि नगदसहित पुरस्कृत गरिएको थियो ।

कार्यक्रममा थाइ नेपाली संघका वर्तमान अध्यक्ष लक्ष्मण केसी, बैंकक शाखा अध्यक्ष रामकुमार ढुंगाना र पदाधिकारी तथा सदस्यहरुको विशेष उपस्थिति रहेको थियो । थाई नेपाली संघ बैकक शाखा अन्तर्गतका सय जना बढी युवाले स्वयंसेवकको भूमिका निर्वाह गरेका थिए ।

Comments