‘कर्ण थापाकाे फरक मत राेकेकाे हाेइन, समूहगत छलफलमा लैजानुस् भनेका हाैं’: राजेन्द्र गाैतम

breaking news

- न्युज नेपाल

काठमाडौं । नेकपा (एमाले) ले स्थायी कमिटी सदस्य कर्ण थापालाई विधान महाधिवेशनमा फरक मत राख्न रोकिएको भन्ने आरोपकाे खण्डन गरेकाे छ ।

पत्रकारहरूसँग कुरा गर्दै एमाले प्रचार विभाग प्रमुख राजेन्द्र प्रसाद गौतमले जारि विधान महाधिवेशनमा थापालाई फरक मत सार्वजनिक गर्न नदिइएको भन्ने दाबी सहि नभएकाे बताएका हुन् ।

गौतमले भने, “उहाँले फरक मत बाँड्नुभएको छ, सबै साथीहरूलाई दिइसक्नुभएको थियो। उहाँले हलबाट समय माग्नुभयो, तर हामीले भन्याै, तपाईँको फरक मत हामीले हेरिसक्यौँ, अब यसलाई समूहगत छलफलमा लैजानुस्। उहाँले पनि यो स्वीकार गर्नुभएको हो।”

गौतमले थापाको फरक मतमाथि छलफल हुनबाट वञ्चित गरिएको भन्ने कुरा असत्य भएको बताए। उनका अनुसार, थापालाई समूहगत छलफलमा सहभागी भएर विचार राख्न भनिएको थियो, तर औपचारिक प्रस्तुतिमा सहभागी नहुनु थापाको व्यक्तिगत निर्णय हो।

“हामीले उहाँलाई विचार राख्न नदिन भनेका होइनौं। उहाँलाई समूहगत छलफलबाट वञ्चित गरिएको छैन। उहाँले वाचन नगरेको मात्रै हो,” गौतमले स्पष्ट पारे।

एमालेको महाधिवेशनमा फरक मत प्रस्तुत गर्ने विषयमा आएको विवादबीच पार्टीको यो स्पष्टीकरण आएको हो।