संविधान विरोधी गतिविधि बढेको र प्रतिगमन निम्त्याउन खोजेको भन्दै सडकमा ओर्लिए युवाहरू

Breaking News

काठमाडौं । जेन–जी आन्दोलनपछि मुलुकमा उत्पन्न विषम परिस्थितिलाई संवैधानिक दायराबाट निकास दिनुपर्नेमा सरोकारवालाहरूले जोड दिएका छन् ।

आन्दोलनले पछि विकसीत पछिल्ला राजनीतिक घटनाक्रमले संविधान विरोधी गतिविधि बढेको र प्रतिगमन निम्त्याउने प्रयास भएको बताउँदै यसका विरुद्ध विभिन्न विद्यार्थी संगठनहरू कर्फ्यूको अवज्ञा गर्दै प्रदर्शनमा उत्रिएका छन् । त्रिचन्द्र बहुमुखी क्याम्पस, स्ववियुको आह्वानमा विद्यार्थी संगठनहरू कफ्र्युको अवज्ञा गर्दै प्रदर्शनमा उत्रिएका हुन् ।

विद्यार्थी संगठनहरू अहिले त्रिचन्द्र बहुमुखी क्याम्पस नजिक प्रदर्शन गरिरहेका छन् । यसअघि स्ववियु अध्यक्ष गोविन्द कोइरालाले सामाजिक सञ्जालमार्फत् सूचना गरेर सबै संगठनहरुलाई प्रदर्शनमा सहभागी हुन आह्वान गरेका थिए ।

‘हामी इतिहासको गम्भीर मोडमा उभिएका छौँ । वर्तमान परिस्थितिले हामी सबैको दायित्व संविधान जोगाउनेमा सबै एकजुट भएर अग्रणी भूमिमा निर्वाह गर्नुपर्ने छ,’ सूचनामा भनिएको थियो, ‘त्यसैले सम्पूर्णको सल्लाहले निम्न स्थानमा आन्दोलनको तयारी भएको हुँदा उपथितिका लागि हार्दिक अपिल गर्दछु ।’

सूचनामा बेलुकी ५ बजे प्रदर्शनको समय उल्लेख थियो । तर, विद्यार्थी संगठनहरू निर्धारित समयभन्दा एक घण्टा अगावै कफ्र्यका बीच सडमा उत्रिएका हुन् । यसअघि नेविसंघले निषेधाज्ञाका बीच सानो–सानो समूहका काठमाडौंका विभिन्न स्थानमा प्रदर्शन गरेको थियो ।