मुग्लिन–नारायणगढ सडकखण्डको पहिरो पन्छाउने काम बिहानैदेखि !

प्रदेश

- न्यूज नेपाल

काठमाडौं । मुग्लिन–नारायणगढ सडकखण्डको तुइन खोला पुल नजिक शुक्रबार साँझदेखि खसेको पहिरो पन्छाउने काम आज बिहानैदेखि पुनस् शुरु भएको छ ।

शुक्रबार साँझदेखि खसेको पहिरोले अवरुद्ध नारायणगढ–मुग्लिन सडकखण्ड अझै सञ्चालनमा आउन सकेको छैन । आज बिहानैदेखि मुग्लिन तर्फ र नारायणगढ तर्फबाट मेसिन परिचालन गरी पहिरो पन्छाउने कार्य शुरु भएको हो ।

सडक डिभिजन कार्यालय भरतपुरका अनुसार ढुंगा झर्ने क्रम अझैसम्म पनि रोकिएको छैन । थप पहिरो नझरे छिटो सवारी आवागमन सञ्चालनमा ल्याउन सकिने बिहानैदेखि पहिरो पन्छाउने काम शुरु भएको छ ।

शनिबार दिनभर लोडर र एक्साभेटर प्रयोग गरी दुवैतर्फबाट पहिरो पन्छाउने प्रयास गरे पनि शनिवार साँझ फेरि ठूलो पहिरो खसेपछि पहिरो पन्छाउने काम पनि रोकिएको थियो । शुक्रबार साँझदेखि भिरबाट सडकमा ढुंगा खसिराखेपछि पहिरो पन्छाउन समस्या भएको हो ।

सडक सुचारु गराउन नसकिएपछि जिल्ला ट्राफिक प्रहरी कार्यालय चितवनले नारायणगढ–मुग्लिन सडकखण्ड हुँदै आउजाउ गर्ने यात्रुहरुलाई वैकल्पिक सडक प्रयोग गर्न आग्रह गरेको छ । सडक बन्द हुँदा हजारौंको संख्यामा सवारी साधनहरू रोकिएका छन् भने यात्रुहरू बाटैमा अलपत्र परेका छन् ।