दसैँसम्म नागढुंगा सुरुङमार्ग सञ्चालन गर्ने तयारी स्वरूप परीक्षण गरिँदै !

Breaking News

- न्युज नेपाल

काठमाडाैं । दसैँसम्म नागढुंगा–सिस्नेखोला सुरुङमार्ग सञ्चालन गर्ने तयारी भइरहेको छ। हाल सुरुङमार्ग परीक्षण चरणमै रहेको सुरुङ आयोजनाले जानकारी दिएको छ।

आयोजनाका इन्जिनियर सञ्जय पन्थीका अनुसार आज बलम्बुस्थित सुरुङअगाडिको फ्लाइओभर परीक्षण सुरु भएको छ, जसलाई ४८ घण्टाभित्र पूरा गर्ने लक्ष्य राखिएको छ। उनले भने, “मुख्य सुरुङको परीक्षण सकिएको छ। अहिले फ्लाइओभरको परीक्षण भइरहेको छ, शनिबारसम्म सकिनेछ।”

पन्थीका अनुसार दसैँमा सुरुङमार्ग खोल्ने तयारी भए पनि परीक्षण अझै जारी भएकाले कहिलेबाट सवारी चलाउन दिने भन्नेबारे टुङ्गो लागेको छैन। सुरुङको पश्चिमी पोर्टलमा केही समस्या देखिएको र समाधानका लागि काम भइरहेको पनि उनले जानकारी दिए।

यसअघि गत शनिबार यातायात व्यवसायीहरूसँगको छलफलमा भौतिक पूर्वाधार तथा यातायात मन्त्री कुलमान घिसिङले दसैँमा सुरुङ सञ्चालन गर्ने निर्देशन दिएका थिए। सुरुङ सञ्चालनका विषयमा सरकार र निर्माण कम्पनीबीच छलफल पनि भइरहेको छ।

दसैँमा काठमाडौँ बाहिरिने यात्रुबाहक सवारी साधनका लागि मात्र यो सुरुङ निःशुल्क सञ्चालनमा ल्याइने जनाइएको छ।