धादिङको ज्वाङखोलामा फेरि खस्यो पहिरो, पृथ्वी राजमार्ग अवरुद्ध !

Breaking News

- न्युज नेपाल

काठमाडौं । धादिङको बेनिघाट रोराङ गाउँपालिका–१० स्थित ज्वाङखोला र तिङराङखानीमा पहिरो खस्दा पृथ्वीराजमार्ग अवरुद्ध भएको छ। ठूलो मात्रामा माटो र ढुंगामाटो सडकमा थुप्रिँदा दुवै तर्फको सवारी आवागमन रोकिएको हो। आज बिहान करिब १० बजेदेखि पहिरो झर्न सुरु भएको प्रहरीले जनाएको छ।

जिल्ला ट्राफिक प्रहरी कार्यालय गजुरीका प्रहरी निरीक्षक सुरज श्रेष्ठका अनुसार सडक सञ्चालनका लागि पहिरो हटाउने कार्य भइरहेको छ। दसैँका लागि घर फर्किने यात्रुको चाप बढिरहेको अवस्थामा सडक बन्द हुँदा हजारौँ सवारी साधन बाटैमा अल्मिएका छन्।

यात्रु तथा सवारी साधनलाई सुरक्षित स्थानमा सार्न सुरक्षाकर्मी परिचालन गरिएको जिल्ला प्रहरी कार्यालय धादिङका प्रहरी उपरीक्षक भेषराज रिजालले जानकारी दिए। साथै आसपासका क्षेत्रमा अझै पहिरोको उच्च जोखिम रहेको भन्दै यात्रुलाई सतर्क रहन र आवश्यक परे वैकल्पिक मार्ग प्रयोग गर्न अनुरोध गरिएको छ।

यसअघि पनि बेनिघाट रोराङ गाउँपालिका–१० जवाङखोलामा सोमबार राति सुक्खा पहिरो खस्दा १७ घण्टासम्म पृथ्वीराजमार्ग अवरुद्ध भएको थियो। बुधबार बेलुका झरेको अर्को पहिरो आज बिहान मात्र पन्छाएर सडक सञ्चालनमा ल्याइएको थियो।