एसिया कप क्रिकेट फाइनल : भारत र पाकिस्तानबिच महाभिडन्त हुँदै !

काठमाडाैं । यूएईमा जारी एसिया कप क्रिकेटको उपाधिका लागि एसिया कप क्रिकेटको ४१ वर्ष लामो इतिहासमा पहिलोपटक भारत र पाकिस्तान फाइनलमा भिड्दैछन् ।

दुबईस्थित दुबई अन्तर्राष्ट्रिय क्रिकेट रंगशालामा बेलुकी सवा ८ बजेदेखि फाइनल खेल सुरु हुनेछ । यस खेललाई विश्व क्रिकेटकै सबैभन्दा प्रतिक्षित प्रतिस्पर्धा मानिएको छ।

यसअघि समूह चरण र सुपर फोरमा गरी दुई पटक आमनेसामने हुँदा दुवैपटक भारतले पाकिस्तानलाई पराजित गरेको छ । यद्यपी यसपटक फाइनल भिडन्त हुने भएकाले वातावरण निकै चर्किएको छ। यस संस्करणमा भारत अपराजित रहँदै फाइनल पुगेको हो। समूह चरण र सुपर फोरमा पाकिस्तानलाई सजिलै हराएको भारतलाई अब उपाधि बचाउन निकै आत्मविश्वास छ।

ओपनर अभिषेक शर्माले ३०९ रनसहित प्रतियोगिताको ब्याटिङ चार्टमा शीर्षस्थानमा छन् भने बलिङमा पनि भारतकै कुलदीप यादव १३ विकेटसहित शीर्षमा छन्। जसप्रीत बुम्राहले पनि पावरप्लेमा निरन्तर नियन्त्रण गर्दै आएका छन्।

अर्कोतर्फ, पाकिस्तानले समूह चरणमा उतारचढाव देखाए पनि बंगलादेशविरुद्धको निर्णायक जितपछि फाइनल प्रवेश पक्का गरेको थियो । कप्तान सलमान आघाले तेस्रो भेटमा भारतलाई हराएर उपाधि जित्न टोली तयार रहेको बताएका छन्।

आइतबारको फाइनलमा राजनीतिक र भावनात्मक दुवै दबाब जोडिएको छ।भारतका कप्तान सूर्यकुमार यादवले भने आफ्नो टोलीले डर नभई योजनामा ध्यान दिने कुरामा जोड दिएका छन्।

त्यस्तै, एशियन क्रिकेट काउन्सिलले याे राेचक प्रतियाेगितामा स्टेडियम फुल हाउस हुने अपेक्षा गरेको छ। यसै कारण यो खेल केवल उपाधिका लागि मात्र नभई, क्रिकेटमै लामो समयदेखि प्रतीक्षित भारत–पाकिस्तान फाइनलका रूपमा इतिहासमा अंकित हुने निश्चित छ।

Comments

• एसीया कप क्रिकेट फाइनल
• न्युज नेपाल
• भारत र पाकिस्तान क्रिकेट