सरकारी टोली चीन जाने तयारीमा, दैलेखको ग्याँस भण्डार रिपोर्टलाई अन्तिम रुप दिने

Breaking News

काठमाडौं । दैलेखको जलजलेमा भेटिएको मिथेन ग्यासको भण्डारणसम्बन्धी अन्तिम छलफलका लागि खानी तथा भूगर्भ विभागको टोली चीन जाने भएको छ। विभागका महानिर्देशक दिनेश कुमार नापितको नेतृत्वमा टोली चीनको छेन्दु जाँदैछ, जहाँ ग्यास उत्खननको विस्तृत प्रतिवेदनलाई अन्तिम रुप दिने विषयमा छलफल हुनेछ।

यसअघि चीनको छेन्दुस्थित चाइना जिओलोजिकल सर्भे र सीएनपीसी सीबु इन्जिनियरिङ कम्पनीको अध्ययन तथा ड्रिलिङबाट जलजले क्षेत्रमा मिथेन ग्यासको ठूलो भण्डार पुष्टि भएको थियो। उद्योग, वाणिज्य तथा आपूर्ति मन्त्रालयले प्रारम्भिक अनुमानमा उक्त क्षेत्रमा ११२ अर्ब घनमिटर प्राकृतिक ग्यास रहेको र यसले करिब ५० वर्षसम्म नेपालको ग्यास माग पुरा गर्नसक्ने दाबी गरेको थियो।

तर, सो अध्ययनको अन्तिम प्रतिवेदन हालसम्म प्राप्त नभएको मन्त्रालयले जनाएको छ। चिनियाँ टोलीले उक्त प्रतिवेदन डिसेम्बर महिनासम्ममा उपलब्ध गराउने जानकारी दिएको छ। त्यसको तयारीस्वरूप नेपालको खानी तथा भूगर्भ विभागले चिनियाँ पक्षसँग संयुक्त छलफलमा सहभागी हुन उच्चस्तरीय टोली चीन पठाउने तयारी गरेको हो।

‘चीनले तयार गरेको प्रतिवेदनको समीक्षाका लागि सम्मेलन आयोजना गरिएको छ,’ खानी विभाग स्रोतले जानकारी दियो, ‘सोही सम्मेलनमा सहभागी भई नेपाली पक्षले आफ्नो प्रतिक्रिया दिनेछ, त्यसपछि मात्र प्रतिवेदन अन्तिमरूपमा तयार हुनेछ।’

२०७८ वैशाख २८ गतेदेखि दैलेखको जलजले क्षेत्रमा जमिनभित्र करिब ४ हजार मिटर गहिराइसम्म ड्रिल गरेर अनुसन्धान गरिएको थियो। ग्यास भेटिएपछि थप परीक्षणका लागि नमूना चीन पठाइएको थियो। चिनियाँ टोलीको अध्ययनबाट ग्यासको गुणस्तर, प्रशोधन लागत, उत्पादन प्रक्रिया तथा व्यावसायिक सम्भावनाबारे निष्कर्ष निकालिने बताइएको छ।