गायिका नितु पौडेलको निधन, बाबुलविरुद्ध जाहेरी दर्ता

breaking news

काठमाडौं । गायिका नितु पौडेलको परिवारले गायक बाबुल गिरीविरुद्ध आत्महत्या दुरुत्साहनमा प्रहरी प्रभाग सिंहदरवारमा जाहेरी दर्ता गराएको प्रहरी स्रोतले जनाएको छ ।

अनामनगरस्थित गिरीकै रेकर्डिङ स्टुडियोमा गायिका नितु पौडेलले गत कात्तिक १ गते आफ्नो शरीरमा पेट्रोल छर्किएर आगो लगाएकी थिइन् । उक्त आत्महत्या दुरुत्साहनमा गायक तथा संगीतकार गिरीकै हात रहेको भन्दै परिवारले गिरीविरुद्ध मुद्धा दायर गरेको हो ।

गत कात्तिक १ गते आफ्नै शरीरमा आगो लगाएकी गायिका पौडेलको कात्तिक ७ गते शुक्रबार उपचारका क्रममा मृत्यु भएको थियो । गायिकाको मृत्यु पश्चात् उनका परिवारका सदस्य आत्महत्या दुरुत्साहनको जाहेरी लिएर प्रहरी वृत्त सिंहदरवारमा पुगेका थिए ।

त्यस्तै, गायिका नितु र बाबुलबिच प्रेम सम्बन्धमा रहेको पनि आशंका गरिएको छ । गायिका पौडेलले आत्मदाहको प्रयास गरे लगत्तै प्रहरीले गायक बाबुल गिरीलाई समेत नियन्त्रणमा लिएर सोधपुछ गरेको थियो । त्यसपछि छाडेको प्रहरीले शुक्रबार पुनः गिरीलाई नियन्त्रणमा लिएको छ ।