धर्ना–जुलुस नगर्न सरकारको आग्रह, असुरक्षा बढ्ने र चुनाव बिथोलिने चिन्ता

Breaking News

काठमाडौं । सरकारले देशभरका राजनीतिक दल, संगठन र नागरिकलाई धर्ना र जुलुसजस्ता कार्यक्रम नगर्न आग्रह गरेको छ। गृह मन्त्रालयका प्रवक्ता तथा सहसचिव आनन्द काफ्लेले शुक्रबार जारी विज्ञप्तिमा सुरक्षामा सम्भावित जोखिम र चुनावी वातावरणमा असर पर्न सक्ने भन्दै यस्तो आग्रह गरिएको उल्लेख गरेका छन्।

जेनजी पुस्ताको नेतृत्वमा भएको प्रदर्शनपछि गठन भएको वर्तमान सरकारले आगामी फागुन २१ गतेका लागि तय भएको निर्वाचन सफल बनाउनका लागि आवश्यक तयारी गरिरहेको विज्ञप्तिमा जनाइएको छ। विज्ञप्तिमा भनिएको छ, “देशमा अस्थिरता फैलाउने स्वार्थ समूहले यस्ता कार्यक्रमहरूमा घुसपैठ गरी अशान्ति र अराजकता सिर्जना गर्न सक्ने देखिएकाले आयोजकहरू सतर्क रहन जरुरी छ। जनताको शान्तिपूर्ण जीवन, सार्वजनिक सेवामा पहुँच र निर्वाचनमा भाग लिन पाउने अधिकार कुण्ठित हुन नदिनु सबैको साझा जिम्मेवारी हो।”

मन्त्रालयले सार्वजनिक सुरक्षामा खलल नपरोस्, साम्प्रदायिक सद्भाव कायम रहोस् र राष्ट्रिय हित सुदृढ होस् भन्ने उद्देश्यले सबैलाई संयमित र जिम्मेवार रहन अपिल गरेको छ। साथै, जायज माग, चासो र सरोकारलाई सम्बोधन गर्न सरकार सधैं तत्पर रहेको उल्लेख गर्दै मन्त्रालयले धर्ना, प्रदर्शन वा आन्दोलनजस्ता कार्यक्रम नगरी वार्ता र संवादमार्फत् समस्या समाधान खोज्न सबै पक्षलाई आग्रह गरेको छ।