अमेरिकी २८ बुँदे प्रस्ताव पछि जेलेन्स्की भन्छन् ‘स्वाभिमान गुमाउनु कि अमेरिकाको साथ ?’

काठमाडौं । युक्रेनका राष्ट्रपति भोलोदिमिर जेलेन्स्कीले अमेरिकाद्वारा प्रस्तावित शान्ति योजनाका कारण देश ‘एउटा अत्यन्त कठिन मोड’मा पुगेको बताएका छन् ।

राष्ट्रका नाममा सम्बोधन गर्दै जेलेन्स्कीले भने, ‘हामीलाई अब एक अति गम्भीर निर्णय गर्नुपर्ने स्थिति आएको छ । या त हामी आफ्नो राष्ट्रिय गरिमा त्याग्नेछौँ वा आफ्नो सबैभन्दा महत्त्वपूर्ण साझेदार अमेरिकाको समर्थन गुमाउनेछौँ ।’

उनका अनुसार यो युक्रेनको इतिहासकै सबभन्दा चुनौतीपूर्ण क्षणहरूमध्ये एक हो । हालै अमेरिकाले २८ बुँदे शान्ति प्रस्ताव गरेपछि जेलेन्स्कीको यस्तो भनाइ आएको हो । अमेरिकी राष्ट्रपति डोनाल्ड ट्रम्पको उक्त प्रस्तावमा युक्रेनले पूर्वी दोनेत्स्क क्षेत्रबाट पछि हट्ने, सैन्य तैनाथी घटाउने र भविष्यमा नेटोमा कहिल्यै सदस्य नबन्ने जस्ता सर्तहरू राखिएका छन् । यी सर्तहरूलाई युक्रेनले अस्वीकार गर्दै आएको छ । रुसले २०२२ मा आक्रमण गरेयता युक्रेनको करिब २० प्रतिशत भूभाग कब्जा थरेको बताइन्छ ।

यसैबीच अमेरिकी राष्ट्रपति डोनाल्ड ट्रम्पले रुस–युक्रेन युद्ध अन्त्य गर्न आफूले प्रस्तुत गरेको योजना स्वीकार गर्न युक्रेनलाई एक हप्ताभन्दा कम समय दिएका छन् । यो योजना रुसका हितमा देखिने विश्लेषण हुँदै आएको छ । ट्रम्पले फक्स न्युजसँगको एक अन्तर्वार्तामा बिहीबारसम्मको समयसीमा तोकिएको बताए । यद्यपि सकाराम्तक कदम चालिए समय थप्न सकिने संकेत उनले गरे ।

२८ बुँदे योजनाले युक्रेनलाई केही भूभाग त्याग्ने, सेनाको आकार घटाउने र नेटोमा नजोडिने प्रतिबद्धता जनाउन दबाब दिएको छ । यी मागहरू लामो समयदेखि रुसका प्रमुख सर्त थिए ।

रुसका राष्ट्रपति भ्लादिमिर पुटिनले अमेरिकी प्रस्ताव प्राप्त भएको र यो शान्ति सम्झौताको आधार बन्न सक्ने बताएका छन् ।तर उनले अमेरिकासँग विस्तृत छलफल नभएको बताए । युरोपेली नेताहरूले युक्रेनप्रति समर्थन दोहोर्‍याउँदै कुनै पनि निर्णय गर्न युक्रेनसँग पनि समन्वय गर्ननुपर्ने बताएका छन् ।

Comments