कर्णालीमाथि विराटनगरको रोमाञ्जक जित, बसिर अहमदको सानदार ब्याटिङ

breaking news

काठमाडौं । बसिर अहमदको सानदार ब्याटिङको बलमा विराटनगर किंग्सले सिद्धार्थ बैंक नेपाल प्रिमियर लिग (एनपीएल) अन्तर्गत कर्णाली याक्सलाई ३ विकेटले पराजित गरेको छ । कर्णालीले दिएको १६१ रनको लक्ष्य विराटनगरले १९.५ ओभरमा ७ विकेटको क्षतिमा पूरा गर्दै रोमाञ्चक जित दर्ता गराएको हो ।

६५-५ को कठिन अवस्थामा पुगेको विराटनगरलाई बसिरले संयमित र जिम्मेवार ब्याटिङ गर्दै जितसम्म पुर्‍याए । उनले ४३ बलमा ३ चौका र ३ छक्का प्रहार गर्दै अविजित ६२ रन बनाए । खेलको अन्तिम ओभरको पाँचौं बलमा नन्दन यादवलाई छक्का हान्दै विराटनगरको जित सुनिश्चित गरेका थिए ।

बसिरले छैटौं विकेटका लागि नारायण जोशीसँग ६९ रनको महत्वपूर्ण साझेदारी गरे । नारायणले १६ बलमा २ चौका र १ छक्का प्रहार गर्दै २५ रन जोडे । कर्णालीका लागि बलिङमा कप्तान सोमपाल कामी र गुल्सन झाले दुई/दुई विकेट लिए ।

यसअघि कीर्तिपुरस्थित त्रिभुवन विश्वविद्यालय (टीयू) अन्तर्राष्ट्रिय क्रिकेट स्टेडियममा टस जितेर पहिले ब्याटिङ गरेको कर्णाली याक्सले ३ विकेट गुमाउँदै १६० रन बनाएको थियो । टोलीका लागि ओपनर प्रियांक पान्चलले अर्धशतकीय इनिङ खेल्दै ४७ बलमा ६ चौका र २ छक्का मद्दतले ६३ रन जोडे । यो उनको यस सिजनको दोस्रो अर्धशतक हो ।

अष्ट्रेलियन खेलाडी विलियम बोसिस्टोले अविजित ४८ रनको योगदान दिए । उनले ४८ बलमा २ चौका प्रहार गरे । गुल्सन झाले २० रन बनाए भने नजिबुल्लाह जद्रान १० रनमा अविजित रहे । मार्क वाट ६ रनमा आउट भए । विराटनगरका लागि बलिङमा मर्चेन्ट डे लाङ र कप्तान सन्दीप लामिछानेले समान एक/एक विकेट हात पारे ।