अख्तियार प्रमुख प्रेम राईलाई धम्की दिने पाठक फिलिपिन्सबाट पक्राउ

काठमाडाैं । अख्तियार दुरुपयोग अनुसन्धान आयोगका प्रमुख आयुक्त प्रेमकुमार राईलाई धम्की दिने प्रकाश पाठक पक्राउ परेका छन्।

नेपाल प्रहरीले उनले गरेको धम्कीको आरोपमा अन्तर्राष्ट्रिय अपराध प्रहरी संगठन (इन्टरपोल) मार्फत फरार अभियुक्तको खोजीमा सहयोग गरेको थियो। पाठकलाई फिलिपिन्सको ब्युरो अफ इमिग्रेसन (बीआई) को फरार अभियुक्त खोजी युनिटले मालोलोस सहरबाट पक्राउ गरेको हो।

बीआईले उनको फोटोसहितको विवरण आफ्नो वेबसाइटमा सार्वजनिक गरेको छ। पाठकविरुद्ध १ डिसेम्बर २०२५ मा काठमाडौं जिल्ला अदालतबाट आपराधिक विश्वासघातको कसुरमा पक्राउ पुर्जी जारी गरिएको थियो। यो जानकारी इन्टरपोलमा पुगेपछि पाठकविरुद्ध जबरजस्ती असुली र आपराधिक षडयन्त्रको आरोपमा डिफ्युजन नोटिस जारी गरिएको थियो।

फिलिपिन्सको अध्यागमन विभागका अनुसार, पाठकले फरार कैदीहरुलाई आत्मसमर्पण नगर्न उक्साउने, आर्थिक सहयोग दिने र हतियारसम्मको पहुँच भएको अभिव्यक्ति दिएका थिए। त्यस्तै, उनी एक उच्चपदस्थ विदेशी सरकारी अधिकारीको हत्या गर्ने षडयन्त्रसँग पनि जोडिएका थिए।

पाठक फिलिपिन्समा १८ अगस्ट २०२५ मा पुगेका थिए र उनलाई १८ डिसेम्बरसम्म त्यहाँ बसोबास गर्ने अनुमति दिइएको थियो। फिलिपिन्सको अध्यागमन विभागले उनलाई डिपोर्ट गर्ने प्रक्रिया पूरा नभएसम्म हिरासतमा राख्ने जानकारी दिएको छ।

पाठकले आफूलाई उग्रवादी संगठनको प्रमुख बताउँदै राईसहितको हत्या गर्ने धम्की दिएका थिए। केही समयअघि काठमाडौं प्रहरीले उनका तीन जना साथीहरुलाई पनि पक्राउ गरेको थियो।

Comments