आईसीसी पुरुष टी–२० विश्वकप २०२६ का लागि नेपालको जर्सी सार्वजनिक !

काठमाडौं । आईसीसी पुरुष टी–२० विश्वकप २०२६ मा नेपाली टोलीले लगाउने जर्सी सार्वजनिक गरिएको छ। सोमबार साँझ काठमाडौंमा आयोजित विशेष कार्यक्रममा नेपाल क्रिकेट संघ (क्यान) ले जर्सी सार्वजनिक गरेको हो।

सार्वजनिक जर्सी तीन फरक संस्करण र मूल्यमा उपलब्ध हुने क्यानले जनाएको छ। खेलाडीले प्रयोग गर्ने उच्च गुणस्तरको जर्सीको मूल्य ३ हजार ४ सय ९९ रुपैयाँ तोकिएको छ। यस्तै, ‘रेप्लिका एडिसन’ जर्सी १ हजार ५ सय ९९ रुपैयाँ र ‘फ्यान जर्सी’ ७ सय ९९ रुपैयाँमा उपलब्ध हुनेछ।

क्यानका अनुसार जर्सी भाटभटेनी सुपरस्टोरलगायतका बिक्री केन्द्रबाट प्राप्त गर्न सकिनेछ।

आईसीसी पुरुष टी–२० विश्वकप २०२६ माघ २४ देखि भारत र श्रीलंकामा सुरु हुँदैछ। प्रतियोगिताको दशौँ संस्करणमा नेपालसहित २० टोलीको सहभागिता रहनेछ। २९ दिनसम्म चल्ने प्रतियोगिता भारतका पाँच र श्रीलंकाका तीन मैदानमा आयोजना हुनेछ। प्रतियोगिता सन् २०२६ फेब्रुअरी ७ देखि मार्च ८ सम्म सञ्चालन हुनेछ।

नेपाल समूह ‘सी’ मा परेको छ। यस समूहमा नेपालसँगै इंग्ल्यान्ड, वेस्ट इन्डिज, बंगलादेश र इटाली छन्।

नेपालले पहिलो खेल इंग्ल्यान्डसँग फेब्रुअरी ८ (माघ २५) मा खेल्नेछ। दोस्रो खेल वेस्ट इन्डिजसँग फागुन ३, तेस्रो खेल बंगलादेशसँग फागुन ५ र अन्तिम खेल फेब्रुअरी १७ (फागुन ५) मा बंगलादेशसँग नै खेल्ने तालिका रहेको छ। नेपालका सबै समूह चरणका खेल मुम्बईस्थित वानखेडे रंगशालामा हुनेछन्।

प्रतियोगिताका खेलहरू भारतका नरेन्द्र मोदी स्टेडियम (अहमदाबाद), एमए चिदम्बरम स्टेडियम (चेन्नई), अरुण जेटली स्टेडियम (नयाँ दिल्ली), वानखेडे स्टेडियम (मुम्बई), इडेन गार्डेन्स (कोलकाता) तथा श्रीलंकाका आर. प्रेमदासा स्टेडियम, सिङ्गालीज स्पोर्ट्स क्लब ग्राउन्ड (कोलम्बो) र पल्लेकेले अन्तर्राष्ट्रिय क्रिकेट स्टेडियम (क्यान्डी) मा आयोजना हुनेछन्।

Comments