कांग्रेस आधिकारिकता विवाद : देउवा समूहको रिट सर्वोच्चमा दर्ता, माघ ६ गतेलाई तोकियो पेसी

आजै पेसी तोक्न आग्रह गरिए पनि सर्वोच्च प्रशासनले नियमावलीका कारण आजै पेसी तोक्न सम्भव नभएको बताएको थियो ।

Blog

- न्यूज नेपाल

काठमाडौं । नेपाली कांग्रेसको गगन थापा समूहलाई आधिकारिकता दिने निर्वाचन आयोगको निर्णयविरुद्ध निवर्तमान सभापति शेरबहादुर देउवा समूहले सर्वोच्च अदालतमा रिट दर्ता गरेको छ। सर्वोच्च प्रशासनले उक्त रिटको पेसी यही माघ ६ गतेका लागि तोकेको छ।

तत्कालीन कार्यवाहक सभापति पूर्णबहादुर खड्काले रिट दर्ता गराएका हुन्। रिट आजै दर्ता गरी आजै पेसी तोक्न आग्रह गरिए पनि सर्वोच्च प्रशासनले नियमावलीका कारण आजकै दिन पेसी तोक्न सम्भव नभएको जानकारी दिएको छ।

निर्वाचन आयोगको निर्णयका कारण नेपाली कांग्रेसको दुईतिहाइ शक्ति पार्टीविहीन हुने र निर्वाचनमा सहभागी हुनबाट वञ्चित हुन सक्ने अवस्था आउने दाबी गर्दै खड्कालगायतका नेताहरूले आजै रिट दर्ता गरेर तत्काल पेसी चढाउन आग्रह गरेका थिए। तर सर्वोच्च प्रशासनले प्रक्रियागत कारण देखाउँदै त्यसलाई अस्वीकार गरेको हो।

यसअघि शनिबार बसेको देउवा समूहको केन्द्रीय कार्यसमिति बैठकले गगन थापा समूहलाई आधिकारिकता दिने निर्वाचन आयोगको निर्णयविरुद्ध राजनीतिक र कानुनी दुवै रूपमा प्रतिवाद गर्ने निर्णय गरेको थियो।

गगन थापा र विश्वप्रकाश शर्मा समूहले विशेष महाधिवेशन आह्वान गरी नयाँ कार्यसमिति चयन गरेका छन्। उक्त महाधिवेशनबाट गगन थापा सभापतिमा निर्वाचित भएका छन्।