नेपाल–चीन वाणिज्य सचिवस्तरीय बैठक: काठमाडौं-ल्हासा बस सेवा पुन: सञ्चालन गरिने

breaking news

काठमाडौं । नेपाल–चीन वाणिज्य सचिवस्तरीय बैठकले काठमाडौं–ल्हासा बस सेवा पुनः सञ्चालन गर्ने तथा सीमा र व्यापार पूर्वाधार निर्माणलाई तीव्रता दिने सहमति गरेको छ। ६–७ माघमा चीनको ल्हासामा सम्पन्न तेस्रो बैठकमा द्विपक्षीय व्यापार, लगानी, पारवहन, भन्सार सहजीकरण, प्राविधिक सहकार्य र व्यापार पूर्वाधार विकासका विषयमा विस्तृत छलफल भएको उद्योग, वाणिज्य तथा आपूर्ति मन्त्रालयले जनाएको छ।

बैठकमा सन् १९८१ को व्यापार तथा भुक्तानी सम्झौता समसामयिक संशोधन, सीमा प्रवेश पास सरलीकरण, टोखा–छहरे सुरुङ निर्माणलाई गति, रासायनिक मल आयातका लागि कोटा निर्धारण तथा नेपाल एलडीसीबाट स्तरोन्नति भएपछि पनि चीनको शून्य भन्सार नीतिलाई निरन्तरता दिने विषयमा छलफल भएको छ।

त्यस्तै, नेपाल–चीन सीमा यातायात सम्झौता प्रभावकारी कार्यान्वयन गरी व्यापार समय र लागत घटाउने, हरित च्यानलमार्फत आयात–निर्यात प्रवर्द्धन, किमाथांका, टिमुरे र कोरला नाकामा आइसीपी निर्माण, सडक तथा पुल निर्माण, रसुवा–जिलोङ भगिनी सम्बन्ध स्थापना र उच्च प्रविधियुक्त कृषि पार्क परियोजना अघि बढाउने सहमति भएको छ। यस संयन्त्रको चौथो बैठक आपसी सहमतिमा सन् २०२७ मा नेपालमा आयोजना गरिनेछ।