फागुन २१ को निर्वाचन देश बनाउने र भत्काउनेबीचको जनमत संग्रह: एमाले अध्यक्ष ओली

breaking news

काठमाडौं। नेकपा एमालेका अध्यक्ष केपी शर्मा ओलीले फागुन २१ गतेको निर्वाचन देश बनाउने र भत्काउनेबीचको जनमत संग्रह भएको बताएका छन् ।

बिहीबार काठमाडौंमा आयोजित चुनावी घोषणा पत्र सार्वजनिक कार्यक्रममा उनले यस्तो बताएका हुन् । उनले निर्वाचन राष्ट्रवादी र राष्ट्रघातवीचको लडाइँ भएको बताए । यसका साथै उनले बनाउने र भत्काउनेबीचको जनमत संग्रहका रुपमा निर्वाचनलाई ब्याख्या गरेका छन् ।

‘निर्वाचन राष्ट्रवादी र राष्ट्रघातबीचको प्रतिस्पर्धा हो । देश बनाउने र भत्काउनेबीचको जनमत संग्रह हो’,, उनले भने, ‘पुराना र नयाँको बहसको अर्थ छैन । एमालेले विकास र सुशासनका लागि आफूलाई प्रमाणित गरिसकेको छ ।’

ओलीले पुस्तान्तरको भ्रम फैलाइएको आरोप लगाए। ‘युवा आगो हो, दिशा चाहिन्छ; अनुभव उज्यालो हो, ऊर्जा चाहिन्छ। युवा र अनुभवीको संयोजनबाट देश बन्छ,’ उनले भने। एमालेले युवाको ऊर्जा र अनुभवलाई जोड्ने पार्टी भएको दाबी उनले गरे।

उनले एमालेकाे घोषणापत्रमा रहेका कुरा निर्वाचनपछि पहिलो मन्त्रिपरिषद् बैठकले तत्काल अघि बढाउने बताए । ओलीले स्थिरता, अनुशासन र योजनाबद्ध कार्यक्रमबाट मात्र सिंहदरबार, संसद् र अदालत निर्माण सम्भव हुने बताए।