ग्यास सिलिण्डर कालोबजारी नियन्त्रणका लागि विभाग सक्रिय, ६ हजार सिलिन्डर बरामद

breaking news

काठमाडौं । वाणिज्य, आपूर्ति तथा उपभोक्ता संरक्षण विभागले ललितपुरको हरिसिद्धि स्थित श्रीराम ग्यास उद्योगको गोदामबाट ठूलो मात्रामा ग्यास सिलिन्डर लुकाएर राखिएको फेला पारेको छ। विभागको अनुगमन टोलीले करिब ६ हजार ३ सय ७७ वटा ग्यास सिलिन्डर कृत्रिम अभाव सिर्जना गर्ने उद्देश्यले भण्डारण गरिएको अवस्थामा बरामद गरेको हो।

अनुगमनपछि विभागले सम्बन्धित उद्योगलाई ३ लाख रुपैयाँ जरिवाना गरेको जनाएको छ। साथै, ती सिलिन्डरहरू नेपाल आयल निगमको समन्वयमा तत्काल बिक्री वितरण गर्न निर्देशन दिइएको छ। विभागले बजारमा ग्यासको माग उच्च रहेका बेला आपूर्तिमा अवरोध नआउने गरी वितरण प्रणाली सहज बनाउन सबै पक्षलाई आग्रह गरेको छ। निगमका अनुसार मध्यपूर्वमा बढ्दो तनावका कारण आपूर्ति प्रभावित हुने आशंकाले उपभोक्ताले अत्यधिक भण्डारण गर्दा बजारमा समस्या देखिएको हो।

यसैबीच, विभागले एलपी ग्यासको अवैध कारोबार, कालोबजारी, कृत्रिम अभाव वा बढी मूल्यमा बिक्री भइरहेको पाइएमा तत्काल ११३७ नम्बरमा निःशुल्क फोन गरेर जानकारी दिन आम सर्वसाधारणलाई अनुरोध गरेको छ। नेपाल आयल निगमले आधा सिलिन्डर मात्र बिक्री गर्ने व्यवस्था गरे पनि बजारमा ग्यास अभावको समस्या अझै कायम रहेको छ। विभागले सबै ग्यास उद्योग तथा वितरकलाई कानुनअनुसार व्यवसाय सञ्चालन गर्न र गैरकानुनी गतिविधि नगर्न चेतावनी दिएको छ।