चार सरकारी वकिलको नियमित सरुवा, को कहाँ पुगे ?

काठमाडौं । महान्यायाधिवक्ताको कार्यालयले नियमित प्रशासनिक व्यवस्थापनअन्तर्गत चार सरकारी वकिलहरूको सरुवा गरेको छ। यसै क्रममा जिल्ला सरकारी वकिल कार्यालय काठमाडौंका प्रमुखमा सहन्यायाधिवक्ता सोमकान्त भण्डारी पुगेका छन्। उता विशेष सरकारी वकिलको कार्यालयका प्रमुखमा सहन्यायाधिवक्ता गंगा पौडेलको सरुवा भएको छ। महान्यायाधिवक्ता कार्यालयका वरिष्ठतम् नायव महान्यायाधिवक्ता सञ्जिवराज रेग्मीका अनुसार उनीहरुको नियमित सरुवा अन्तर्गत कार्य अवधि पुगिसकेकाले सरुवा गरिएको बताए ।

भण्डारी र पौडेल यसअघि महान्यायाधिवक्ताको कार्यालयमा कार्यरत थिए। जिल्ला सरकारी वकिलको कार्यालय काठमाडौंका प्रमुख रामहरि काफ्ले र विशेष सकारी वकिलको कार्यालयका प्रमुख मोहन सागर बस्याललाई महान्यायाधिवक्ताको कार्यालयमा सरुवा गरिएको छ। बस्याल १७ महिनादेखि विशेष सरकारी वकिलको कार्यालयमा कार्यरत थिए । काफ्ले भने १५ महिनादेखि जिल्ला सरकारी वकिलको कार्यालयका प्रमुखका रुपमा कार्यरत थिए ।

बस्याल र काफ्ले सरकारी वकिलमा अनुभवी र व्यवसायिक कर्मचारीका रुपमा चिनिन्छन् । सरुवा भएर जाने भण्डारी यसअघि उच्च सरकारी वकिलको कार्यालय बुटवलका प्रमुख थिए । उनी अनुभवी , अध्ययनशील र वकालत गर्न अब्बल सरकारी वकिलमा गनिन्छन् । पौडेल यसअघि अख्तियार दुरुपयोग अनुसन्धान आयोग र जिल्ला सरकारी वकिलको कार्यालय काठमाडौंको प्रमुख भइसकेका व्यक्ति हुन् । उनी पनि अनुभवी , अध्ययनशील र वकालत गर्न अब्बल सरकारी वकिलमा गनिन्छन् ।

Comments