टेम्पोमाथि रुख ढल्दा दुई जनाको ज्यान गयो, तीन गम्भीर घाइते

breaking news

जनकपुरधाम । हावाहुरीका कारण महोत्तरीको जलेश्वरमा रुख टेम्पोमाथि खस्दा दुई जनाको ज्यान गएको छ । तीनजना गम्भीर घाइते छन् । जलेश्वरको प्रकौली आर्मी क्याम्प अगाडि शनिबार सभ्यताको रुख टेम्पुमाथि ढल्दा रुखमुनी च्यापिएर दुई जनाको घटनास्थलमै मृत्यु भएको प्रहरीले जनाएको छ ।

घाइते तीनजनालाई नेपाली सेनाले तत्कालै उद्धार गरी उपचारको लागि प्रादेशिक अस्पताल जनकपुर लगेको छ । सो घटनामा परेर ज्यान गुमाउनेहरुमा धनुषाको जनकपुरधाम उपमहानगरपालिका–२० की ४१ वर्षीया सकुन्तला देवी र महोत्तरी एकडारा गाउँपालिका–३ बस्ने ३३ वर्षीय राहुल मलिक छन् । शव प्रादेशिक अस्पताल जलेश्वरमा रहेको प्रहरीले जनाएको छ ।

यस्तै घाइते हुनेहरूमा टेम्पु चालक महोत्तरी जलेश्वर नगरपालिका ११ बस्ने ५२ वर्षीय हरेन्द्र ठाकुर, एकडारा गाउँपालिका–३ बस्ने तपेश्वर मलिककी श्रीमती ४३ वर्षीया फेकनीदेवी मलिक, जनकपुरधाम–१२ बस्ने १७ का धिरज मलिक र जनकपुरधाम–२० बस्ने १४ वर्षीया रिया पण्डित छन् । उनीहरूमध्ये एकको अवस्था सामान्य छ ।