ट्रम्प फर्किएलगत्तै पुटिन चीनको औपचारिक भ्रमणमा जाँदै

breaking news

बेइजिङ । अमेरिकी राष्ट्रपति डोनाल्ड ट्रम्पको भ्रमणलगत्तै रुसी राष्ट्रपति भ्लादिमिर पुटिन भोलि चीनको दुई दिने औपचारिक भ्रमणमा जाँदै हुनुहुन्छ । चिनियाँ राष्ट्रपति सी जिनपिङको निमन्त्रणमा पुटिनले राजकीय भ्रमण गर्न लाग्नुभएको हो । यसअघि ट्रम्पले यही मे १३ देखि १५ सम्म चीनको भ्रमण गर्नुभएको थियो । झन्डै १ दशकपछि भएको अमेरिकी राष्ट्रपतिको चीन भ्रमण विश्वको नजरमा थियो । यसको ठीक ३ दिनपछि रुसी राष्ट्रपति पुटिन बेइजिङ पुग्नु हुने भएको हो ।

भ्रमणमा पुटिन र सी जिनपिङले द्विपक्षीय सम्बन्ध, चीन र रुसबीचको व्यापक साझेदारी र रणनीतिक सहयोगलाई अझ गहिरो बनाउने तरिका र महत्त्वपूर्ण अन्तर्राष्ट्रिय तथा क्षेत्रीय मुद्दाहरूमा विचार आदानप्रदान गर्ने चिनियाँ विदेश मन्त्रालयलाई उद्धृत गर्दै बीबीसीले जनाएको छ । दुई देशले उच्चस्तरीय संयुक्त वक्तव्य र धेरै द्विपक्षीय दस्तावेजहरूमा हस्ताक्षर गर्ने योजना बनाइरहेका खबरमा उल्लेख छ ।

रुससँग चीनको गहिरिँदै गएको सम्बन्ध पश्चिमा देशहरूका लागि चिन्ताको विषय बनेको छ । विशेषगरी रुसले युक्रेनमा आक्रमण शुरू गरेदेखि दुई देश नजिकिएका छन् । सी र पुटिनबीच ४० भन्दा धेरै पटक भेटवार्ता भइसकेको बेलायती पत्रिका ‘द गार्जियन’ ले लेखेको छ । सन् २०२२ यता चीन र रुसको द्विपक्षीय व्यापार कीर्तिमानी स्तरमा पुगेको छ । रुसको कुल निर्यातको एक चौथाइभन्दा धेरै हिस्सा चीनले ओगटेको छ ।