मुस्ताङमा पहिलो पटक एआई ड्रोनमार्फत वन गस्ती सुरु

काठमाडौं । मुस्ताङमा पहिलो पटक एआई प्रविधियुक्त ड्रोन प्रयोग गरेर वन गस्ती सुरु गरिएको छ । अन्नपूणं संरक्षण क्षेत्र आयोजना अन्तर्गत इलाका संरक्षण कार्यालय जोमसोमले उच्चलेक, खर्क तथा पाटन क्षेत्रको अनुगमन गर्न आधुनिक ड्रोन प्रविधि प्रयोगमा ल्याएको हो ।

यसअघि मुस्ताङमा ड्रोन प्रविधि चलचित्र, डकुमेन्ट्री तथा विभिन्न चाडपर्वका श्रव्यदृश्य छायाङ्कनमा प्रयोग हुँदै आएको थियो । तर वन संरक्षण तथा गस्तीका लागि एआई ड्रोन प्रयोग गरिएको यो पहिलो पटक हो ।

कठिन भूगोल, दुर्गम क्षेत्र तथा न्यून मानव बस्ती भएका स्थानमा वन अनुगमनलाई प्रभावकारी बनाउन ड्रोन प्रविधि सुरु गरिएको एक्याप जोमसोमले जनाएको छ ।

एक्याप जोमसोमका वरिष्ठ प्राकृतिक स्रोत संरक्षण सहायक संजोग थकालीका अनुसार संरक्षित वन, वन पैदावार तथा वन्यजन्तुको संरक्षणका साथै चोरी शिकारी र वन क्षेत्रमा हुने अवाञ्छित गतिविधि नियन्त्रणका लागि ड्रोन प्रयोग गरिएको हो ।

ड्रोनमार्फत वारागुङ मुक्तिक्षेत्र गाउँपालिका–१ को लुप्रा लेक तथा घरपझोङ गाउँपालिकाको भ्रप्सा र नमखुलेङ्क क्षेत्रमा गस्ती भइसकेको छ । हाल यार्सागुम्बा सङ्कलनको सिजन चलिरहेकाले एक्यापले एआई ड्रोनमार्फत छड्के अनुगमनलाई तीव्र बनाएको जनाएको छ ।

यार्सागुम्बा सङ्कलनका क्रममा हुनसक्ने अवाञ्छित गतिविधि, उच्चलेक क्षेत्रमा पासो थाप्ने, बन्दुक बोकेर वन्यजन्तुको चोरी शिकारी गर्ने तथा आगलागीको जोखिम नियन्त्रणका लागि आधुनिक प्रविधिको प्रयोग गरिएको हो ।

एक्यापका अनुसार प्रयोग गरिएको ड्रोनको तौल १ हजार ६३ ग्राम रहेको छ । उक्त ड्रोन १५ देखि २० किलोमिटरसम्म उड्न सक्ने तथा करिब ६ किलोमिटर उचाइसम्म पुग्न सक्ने क्षमता राख्छ । ड्रोनलाई प्रतिघण्टा ९० देखि ९७ किलोमिटर गतिमा सञ्चालन गर्न सकिन्छ ।

Comments