किशोर श्रेष्ठविरुद्ध षडयन्त्र रचिएको भन्दै नेपाल पत्रकार महासंघ काठमाडौं शाखाले जनायो आपत्ति

काठमाडौं । नेपाल पत्रकार महासंघ काठमाडौं शाखाले वरिष्ठ पत्रकार तथा जनआस्थाका प्रधानसम्पादक किशोर श्रेष्ठ र जनआस्था साप्ताहिकलाई लक्षित गर्दै सामाजिक सञ्जाल, अज्ञात फोन कल र विदेशी नम्बरमार्फत मानसिक दबाब, आर्थिक प्रलोभन तथा योजनाबद्ध दुष्प्रचार भइरहेको भन्दै गम्भीर ध्यानाकर्षण भएको जनाएको छ।

महासंघ काठमाडौं शाखाले शुक्रबार प्रेस विज्ञप्ति जारी गर्दै तथ्यमा आधारित समाचार र खोजमूलक पत्रकारिताको प्रतिवाद गर्न नसकेपछि पत्रकार तथा सञ्चारमाध्यमलाई विभिन्न माध्यमबाट फसाउने, नियोजित रूपमा चरित्रहत्या गर्ने, भ्रम फैलाउने तथा पत्रकारको विश्वसनीयतामाथि आक्रमण गर्ने कार्य भइरहेको उल्लेख गरेको छ।

विज्ञप्तिमा यस्ता गतिविधिलाई निन्दनीय, आपत्तिजनक र प्रेस स्वतन्त्रतामाथिको गम्भीर हस्तक्षेपको रूपमा व्याख्या गरिएको छ। महासंघले पत्रकारलाई त्रसित नबनाउन, सञ्चारमाध्यमलाई कमजोर पार्ने प्रयास नगर्न र स्वतन्त्र आवाजमाथि दबाब सिर्जना गर्ने गतिविधि तत्काल रोक्न चेतावनी दिएको छ।

महासंघले विशेषगरी वरिष्ठ पत्रकार किशोर श्रेष्ठमाथि लक्षित गतिविधिले पत्रकारिता क्षेत्रमा त्रास र असुरक्षाको वातावरण सिर्जना गरेको जनाएको छ। यस्ता संगठित आक्रमणप्रति राज्य संयन्त्र गम्भीर बन्नुपर्ने उल्लेख गर्दै सम्बन्धित निकायलाई निष्पक्ष, स्वतन्त्र र शीघ्र अनुसन्धान गरी संलग्न व्यक्ति तथा समूहलाई कानुनी दायरामा ल्याउन माग गरेको छ।

साथै प्रेस तथा अभिव्यक्ति स्वतन्त्रतालाई कमजोर बनाउने, पत्रकारलाई धम्क्याउने र सञ्चारमाध्यममाथि अविश्वास सिर्जना गर्ने कुनै पनि गतिविधिविरुद्ध सम्पूर्ण सञ्चारकर्मी, नागरिक समाज तथा लोकतन्त्रप्रेमी शक्तिहरू एकजुट हुन महासंघले आह्वान गरेको छ।

नेपाल पत्रकार महासंघ काठमाडौं शाखाका सचिव रमेश कुमार बोहोराद्वारा हस्ताक्षरित विज्ञप्तिमा पत्रकार सुरक्षा, व्यावसायिक पत्रकारिता र प्रेस स्वतन्त्रताको पक्षमा सधैं दृढतापूर्वक उभिने प्रतिबद्धता व्यक्त गरिएको छ।

Comments