संखुवासभामा जन्मिएका सर्वोच्चका रजिस्ट्रार मानबहादुर कार्की प्रमुख निर्वाचन आयुक्तमा सिफारिस

काठमाडौं। संवैधानिक परिषद्ले सर्वोच्च अदालतका रजिस्ट्रार मानबहादुर कार्कीलाई प्रमुख निर्वाचन आयुक्त पदमा सिफारिस गरेको छ। कार्की दुईदेखि सर्वोच्च अदालतमा रजिस्टार (विशिष्ट श्रेणीको सचिव सरह) को रूपमा कार्यरत थिए। कानून, न्यायसँगै चुस्त प्रशासनिक क्षमता भएका कार्की प्रमुख निर्वाचन आयुक्तमा सिफारिस भएसँगै निर्वाचन आयोगले करिव १४ महिनादेखि रिक्त प्रमुख पाउने भएको छ ।

संयोगले संखुवासभाले लगातार दोस्रो प्रमुख निर्वाचन आयुक्त पाएको छ। कार्की संखुवासभाको माम्लिङमा जन्मिएका हुन्। पुर्खौली घर संखुवासभा भए पनि कार्कीको परिवार हाल मोरङ जिल्लाको रतुवामाई (साबिकको इटहरा गा.वि.स.) गाउँपालिका तथा विराटनगर उपमहानगरपालिकामा बसोबास गर्दै आएको छ। यसअघिका प्रमुख निर्वाचन आयुक्त दिनेशकुमार थपलिया पनि संखुवासभाकै थिए। थपिलयाले प्रमुख निर्वाचन आयुक्तको आफ्नो ६ वर्षे कार्यकाल २०८२ बैशाख ५ गते पूरा गरी अवकास पाएका थिए।

‘नबिराउनू, नडराउनू’को सिद्धान्त बोकेका कार्की न्याय प्रशासनमा निडर र हक्की स्वभावले परिचित छन्। २०२६ साल साउन १८ गते जन्मिएका कार्की २०५२ साल पुस २६ गते न्याय सेवाको अधिकृत पदमा नियुक्त भएका थिए। त्यसपछि उनले विभिन्न तहमा जिम्मेवारी निर्वाह गर्दै २०७१ साल माघ २९ गते सहसचिव भएका थिए ।

उनले सर्वोच्च अदालत सहरजिस्ट्रार र उच्च अदालत पाटनको रजिस्ट्रारका रूपमा समेत काम गरिसकेका थिए। न्याय प्रशासनमा उनको कार्यशैली इमान्दार, निष्पक्ष र दक्ष प्रशासकका रूपमा परिचित रहेको छ। सर्वोच्च अदालतको रजिस्ट्रार पदबाट राजीनामा दिएर संसदीय सुनुवाइ प्रक्रिया पूरा गरेपछि अनुमोदनपछि कार्की राष्ट्रपतिबाट प्रमुख निर्वाचन आयुक्तमा नियुक्त हुनेछन्।

यसैगरी संवैधानिक परिषद्ले रिक्त निर्वाचन आयुक्तमा नेपाल प्रहरीका पूर्व नायव महानिरीक्षक (डीआईजी) डा. राजीव सुब्बा र पूर्व सरकारी वकिल (सहसचिव स्तर) गुरु वाग्लेलाई सिफारिस गरेको छ। डा. सुब्बा नेपाल प्रहरीमा सूचना प्रविधि (आईटी) विशेषज्ञका रूपमा लामो समय कार्यरत रहेर डीआईजी पदबाट अवकाश प्राप्त गरेका हुन्। अवकाशपछि उनी हाल मदन भण्डारी प्राविधिक विश्वविद्यालयसँग आबद्ध छन्। सूचना प्रविधि र प्रशासनिक व्यवस्थापनमा उनको लामो अनुभव रहेको छ। त्यस्तै ओखलढुंगाका गुरु वाग्लेले निर्वाचनसम्बन्धी कानून, प्रक्रिया तथा प्रशासनमा लामो अनुभव हासिल गरेका छन्।

Comments