स्पेनसँग पराजित भएसँगै रोनाल्डोको विश्वकप यात्रा सकियो

काठमाडौं: विश्व फुटबलका महान खेलाडीमध्ये एक मानिने क्रिस्टियानो रोनाल्डोको विश्वकप यात्रा अन्ततः उपाधिविहीन रूपमा समाप्त भएको छ। पोर्चुगल स्पेनसँग १–० ले पराजित भएपछि रोनाल्डोको अन्तिम विश्वकप अभियान पनि समाप्त भएको हो। अमेरिकाको डलासमा सम्पन्न अन्तिम–१६ को प्रतिस्पर्धामा निर्धारित समय गोलरहित बराबरीमा सकिएपछि इन्जुरी समयमा स्पेनका मिकेल मेरिनोले निर्णायक गोल गर्दै टोलीलाई क्वार्टरफाइनलमा पुर्‍याए। खेल समाप्त भएपछि ४१ वर्षीय रोनाल्डो भावुक हुँदै आँसु झारेका थिए।

पाँच पटकका बालोन डी’ओर विजेता, पाँच पटकका यूईएफए च्याम्पियन्स लिग विजेता तथा युरो २०१६ का च्याम्पियन रोनाल्डोले क्लब र राष्ट्रिय टोलीका लागि हालसम्म विश्व कीर्तिमानी ९७६ गोल गरेका छन्। उनले लगातार छ वटा विश्वकपमा गोल गर्ने दुर्लभ कीर्तिमान पनि बनाएका छन्। यद्यपि विश्वकप उपाधि जित्ने उनको सपना भने पूरा हुन सकेन। सन् २००६ मा पोर्चुगल सेमिफाइनल पुगेको प्रदर्शन नै उनको विश्वकप यात्राको उत्कृष्ट उपलब्धि रह्यो।

विश्वकपअघि नै यो आफ्नो अन्तिम विश्वकप हुने घोषणा गरेका रोनाल्डोले खेलपछि राष्ट्रिय टोलीबाट भविष्यबारे तत्काल निर्णय नगर्ने संकेत दिएका छन्। उनले भने, “अब परिवारसँग समय बिताएर शान्त मनले आगामी निर्णय लिनेछु।”यस विश्वकपमा रोनाल्डोलाई प्रत्येक खेलमा पहिलो रोजाइमा उतार्ने निर्णय पोर्चुगलका लागि उचित थियो वा थिएन भन्ने विषयमा बहस जारी रहने देखिएको छ।

बीबीसी रेडियो ५ लाइभका विश्लेषक तथा पूर्व इंग्ल्यान्ड स्ट्राइकर क्रिस सटनले भने प्रशिक्षक रोबर्टो मार्टिनेजको रणनीतिप्रति कडा आलोचना गरेका छन्। उनका अनुसार, “रोनाल्डो मैदानमा प्रभावशाली देखिएनन्। उनीबाट टोलीले अपेक्षित योगदान पाएन। रोबर्टो मार्टिनेजले एक खेलाडीलाई अत्यधिक प्राथमिकता दिए, जसको मूल्य पोर्चुगलले चुकायो।”

पराजयपछि पोर्चुगलका मुख्य प्रशिक्षक रोबर्टो मार्टिनेजले पदबाट अलग हुने घोषणा गरेका छन्। उनले रोनाल्डोको योगदानको उच्च प्रशंसा गर्दै भने, “यस विश्वकपमा उनले टोलीका लागि गरेको प्रयासप्रति हामी आभारी छौं। विश्वकप जित्ने उनको सपना थियो र त्यसका लागि उनले अनुकरणीय समर्पण देखाए। उनी केवल महान फुटबलर मात्र होइन, उत्कृष्ट व्यक्तित्व पनि हुन्।”यससँगै विश्व फुटबलका सर्वकालीन महान खेलाडीमध्ये एक मानिने क्रिस्टियानो रोनाल्डोको विश्वकप अध्याय भावुक अन्त्यमा पुगेको छ।

Comments