पुनः प्रयोगयोग्य रकेट परीक्षणमा चीन सफल, अन्तरिक्ष दौडमा नयाँ उपलब्धि

काठमाडौं । चीनले पुनः प्रयोग गर्न मिल्ने रकेटको सफल अवतरण गर्दै अन्तरिक्ष प्रविधिमा नयाँ उपलब्धि हासिल गरेको छ। चाइना एरोस्पेस साइन्स एन्ड टेक्नोलोजी कर्पोरेशनका अनुसार ‘लङ मार्च–१०बी’ रकेट स्थानीय समयअनुसार आज दिउँसो १२स्१५ बजे दक्षिण चीनको हाइनानबाट प्रक्षेपण गरिएको थियो।

प्रक्षेपणपछि करिब ६ मिनेटमा रकेटको माथिल्लो भागबाट छुट्टिएको ‘बुस्टर’ ठाडो रूपमा पृथ्वीमा फर्केर समुद्रमा रहेको तैरिने प्लेटफर्ममा सुरक्षित रूपमा अवतरण गर्न सफल भएको बीबीसीले जनाएको छ।

यस उपलब्धिसँगै चीन पुनः प्रयोग गर्न मिल्ने रकेट प्रविधिमा महत्वपूर्ण चरणमा पुगेको छ। यसअघि अमेरिकी कम्पनी स्पेसएक्स र जेफ बेजोसको ब्लू ओरिजिनले यस्ता सफल अवतरण गरिसकेका छन्। चीनको यो सफलता अमेरिकाको अग्रताप्रति चुनौतीका रूपमा पनि हेरिएको छ।

सामान्यतया रकेटका विभिन्न भाग प्रक्षेपणका क्रममा छुट्टिएर नष्ट हुने भएकाले अन्तरिक्ष मिसनको लागत महँगो पर्ने गर्छ। तर सबैभन्दा मूल्यवान् मानिने ‘बुस्टर’ पुनः प्रयोग गर्न सकिएमा स्याटेलाइट प्रक्षेपण तथा अन्तरिक्ष अनुसन्धानको खर्च उल्लेख्य रूपमा घटाउन सकिन्छ।

स्पेसएक्सले सन् २०१५ डिसेम्बरमा पहिलो पटक ‘फाल्कन–९’ रकेटको बुस्टर सफलतापूर्वक अवतरण गराएको थियो भने ब्लू ओरिजिनले सन् २०२५ नोभेम्बरमा ‘न्यू ग्लेन’ रकेट अवतरण गराएको थियो।

कम उचाइको पृथ्वीको कक्षसम्म कम्तीमा १६ मेट्रिक टन भार पुर्‍याउन सक्ने क्षमता रहेको ‘लङ मार्च–१०बी’ लाई स्पेसएक्सको ‘फाल्कन–९’सँग तुलना गरिएको छ। यद्यपि, यो रकेटले जमिनको प्याड वा ड्रोन जहाजमा प्रत्यक्ष अवतरण गर्ने प्रणाली प्रयोग गर्दैन। यसको सट्टा रकेटमा जडान गरिएका ‘ल्यान्डिङ हुक’ले तैरिरहेको प्लेटफर्ममा रहेको विशेष जाली समातेर सुरक्षित अवतरण गर्ने प्रविधि अपनाइएको छ।

Comments