भारत सधैं नेपालको ‘सुख दुःखको साथी’: भारतीय रक्षामन्त्री सिंह

breaking news

काठमाडौं । भारतका रक्षामन्त्री राजनाथ सिंहले नेपालमा हालै आएको विनाशकारी बाढीबाट भएको जनधनको क्षतिप्रति गहिरो दुःख व्यक्त गरेका छन्। नयाँ दिल्लीस्थित नेपाली दूतावास पुगेर रक्षामन्त्री सिंहले बाढीमा परी ज्यान गुमाउनेहरूप्रति श्रद्धाञ्जली अर्पण गर्दै शोक पुस्तिकामा हस्ताक्षर गरेका हुन्। उनले भारत सरकार तथा भारतीय जनताका तर्फबाट नेपाल सरकार र सम्पूर्ण नेपाली जनताप्रति हार्दिक समवेदना व्यक्त गरेका छन्।

गत भदौ १० गते आएको बाढीबाट भएको ठूलो जनधनको क्षतिप्रति दुःख व्यक्त गर्दै सिंहले प्राकृतिक विपत्तिबाट नेपाली नागरिकका साथै भारतीयलगायत अन्य विदेशी नागरिकसमेत प्रभावित भएको उल्लेख गरेका छन्। उनले विपत्तिमा ज्यान गुमाउनेका परिवारप्रति प्रार्थना तथा समवेदना व्यक्त गर्दै घाइतेहरूको शीघ्र स्वास्थ्यलाभको कामना गरेका छन्।

सिंहले आफ्नो आधिकारिक सामाजिक सञ्जाल ‘एक्स’मार्फत नेपालप्रतिको भारतको ऐक्यबद्धता समेत व्यक्त गरेका छन्। नेपाल र भारतबीचको गहिरो सम्बन्धलाई स्मरण गर्दै उनले भारत सधैं नेपालको सुख–दुःखको साथीका रूपमा उभिँदै आएको बताएका छन्। उनले कठिन परिस्थितिमा पनि भारत नेपालका नागरिकसँग काँधमा काँध मिलाएर उभिएको उल्लेख गर्दै नेपालको खोज, उद्धार तथा पुनर्स्थापनाका प्रयासमा सहयोग गर्न भारत पूर्ण रूपमा प्रतिबद्ध रहेको बताएका छन्।