केरुङबाट १,५०० नेपाली फर्काउने तयारी, १७६ ट्रक तथा कन्टेनर ‘डाइभर्ट’ गरिने

काठमाडौं । परराष्ट्र मन्त्रालयले चीनको तिब्बतस्थित केरुङमा करिब १ हजार ५०० नेपाली नागरिक रहेको जनाएको छ। मन्त्रालयले उनीहरूलाई स्वदेश फर्काउन चिनियाँ पक्षसँग आवश्यक समन्वय भइरहेको जानकारी दिएको छ। बुधबार आयोजित पत्रकार सम्मेलनमा परराष्ट्र मन्त्रालयका प्रवक्ता लोकबहादुर पौडेल क्षेत्रीले केरुङमा रहेका नेपालीमध्ये छिट्टै स्वदेश फर्कन चाहने नागरिकलाई नेपाल ल्याउन चीनसँग समन्वय भइरहेको बताए।

“हाल करिब १५ सय जना नेपाली नागरिकहरू केरुङमा रहेका छन् र छिट्टै फर्कन चाहनेहरूका लागि हामी चिनियाँ पक्षसँग समन्वय गरिरहेका छौँ,” प्रवक्ता क्षेत्रीले भने। गत भदौ १० गते रसुवाको भोटेकोसी नदीमा आएको भीषण बाढीका कारण रसुवासहित नुवाकोट, धादिङ, गोरखा र तनहुँलगायत जिल्लामा ठूलो जनधनको क्षति भएको थियो। उक्त बाढीपछि सीमावर्ती क्षेत्रमा आवागमन प्रभावित हुँदा केही नेपाली नागरिक केरुङमा रोकिएका हुन्।

परराष्ट्र मन्त्रालयका अनुसार केरुङमा नेपालीका १७६ वटा ट्रक तथा कन्टेनरसमेत रोकिएका छन्। ती ट्रक तथा कन्टेनरलाई उपयुक्त सीमा नाकाबाट नेपालतर्फ डाइभर्ट गराउन चिनियाँ अधिकारीहरूसँग समन्वय भइरहेको प्रवक्ता क्षेत्रीले जानकारी दिए।

“केरुङमा रहेका १७६ वटा नेपाली ट्रक तथा कन्टेनरहरूको हकमा, तिनलाई उपयुक्त सीमा नाकाबाट डाइभर्ट गराउनका लागि हामी चिनियाँ अधिकारीहरूसँग समन्वय गरिरहेका छौँ,” उनले भने।

यसैबीच, भदौ १० गते आएको बाढीपछि सीमाको चिनियाँ क्षेत्रमा करिब १०० नेपाली नागरिक बेपत्ता भएको परराष्ट्र मन्त्रालयले जनाएको छ। मन्त्रालयले उनीहरूको अवस्थाबारे खोज तथा समन्वयका लागि आवश्यक पहल भइरहेको जनाएको छ।

Comments