भोटेकोशी बाढीपीडितका लागि एनआरएनए आईसीसी अन्तर्गतको ‘पीएनओ’ संयोजक कुमार कार्कीद्वारा एक लाख रुपियाँ सहयोग

अर्थ र बाणिज्य

काठमाडौँ । भोटेकोशीका बाढीपीडितहरूका लागि गैरआवासीय नेपाली संघ (NRNA) अन्तर्राष्ट्रिय समन्वय परिषद् (ICC) अन्तर्गतको (पीपुल अफ नेपाली अरिजिन) PNO का संयोजक कुमार कार्कीले एक लाख रुपियाँ सहयोग गर्नुभएको छ।

थाइ नेपाली संघ थाइल्यान्डका पूर्वअध्यक्ष समेत रहनु भएका कार्कीले रसुवा तथा भोटेकोशी क्षेत्रका बाढी प्रभावितहरूको सहयोगार्थ प्रधानमन्त्री दैवी प्रकोप तथा राहत कोष (एनआरएनए आपतकालीन कोषमार्फत) मार्फत १ लाख रुपियाँ आर्थिक सहयोग प्रदान गर्नु भएको हो ।

संकटको यो घडीमा PNO का संयोजक कार्की र उहाँको सम्पूर्ण टीमले पुर्‍याउनुभएको आर्थिक सहयोगले पीडित परिवारहरूलाई राहत र पुनर्निमाणको काममा ईँटामा इँटा थप्न मद्दत पुग्नेछ।
बाढी पीडितका लागि यो एकलाख रुपियाँका अतिरिक्त निर्माण कार्यलगायत अन्य सहयोग पनि जुटाउँदै जाने PNO संयोजक कार्कीले न्यूज नेपाल अपडेटलाई जानकारी दिनु भयो ।

म्यानमारमा जन्म भई हाल थाइल्याण्डलाई कर्मथलो बनाउनु भएका कार्की ‘एनआरएनए एनसीसी थाइल्याण्ड’ का सल्लाहाकार हुनुहुन्छ । वहाँ थाइ नेपाली संघको वर्तमान संरक्षक पनि हुनुहुन्छ । नेपालमा नागरिकता प्रणाली लागू हुनुपूर्व विभिन्न मुलुकमा बसाइँ सरेका नेपाली मूलका नागरिकहरूलाई आफ्नो पुर्खाको भूमिसँग जोड्ने उद्देश्यले पीएनओको स्थापना गरिएको हो। नेपालको सुख–दुःखमा सधैँ साथ दिने लक्ष्य राखेको PNO संस्थाले आगामी दिनमा पनि नेपालमा संस्थागत रूपमा हातेमालो र सहयोग गर्दै जाने प्रतिबद्धता व्यक्त गरेको छ।