स्थानीय निर्वाचन : माओवादीको ध्यान स्थनीय तहमा केन्द्रित

राजनीति

काठमाडौँ, २२ चैत । स्थानीय तहको निर्वाचनको मिति नजिकिँदै जाँदा सत्तारुढ दल नेकपा (माओवादी केन्द्र)ले देशव्यापी रुपमा नै सङ्गठन सुदृढीकरण र उम्मेदवार चयनको क्रमलाई तीव्र पारेको छ ।

माओवादीले ७४४ वटै स्थानीय तहमा केन्द्रीय नेतालाई परिचालन गरेर निर्वाचन केन्द्रित गतिविधि अगाडि बढाएको र ‘जनताको घर आँगनमा जाऊँ माओवादी केन्द्रलाई विजयी गराऊँ’ भन्ने नाराका साथ मतदातालाई निर्वाचनमा सहभागी हुन आग्रह गरिरहेको छ ।

पार्टी प्रवक्ता पम्फा भुसालकाअनुसार निर्वाचनलाई केन्द्रित गरेर जिल्ला तहमा निर्वाचनका कार्यक्रम अगाडि बढाइएका छन् । स्थानीय आवश्यकताका आधारमा कार्यक्रम अगाडि बढाइएको र आगामी वैशाखको पहिलो साताभित्र उम्मेदवारको टुङ्गो लगाइने छ ।

पार्टीका केन्द्रीय कार्यालय सदस्य देव गुरुङको संयोजत्वमा रहेको समितिले निर्वाचन घोषणापत्र तयार पारेर स्थानीय तहमा पठाएको र प्राप्त सुझावका आधारमा परिमार्जन गरेर केही दिनभित्रै सार्वजनिक गर्ने तयारी माओवादी केन्द्रले गरेको छ ।

संविधानसभाबाट संविधान जारी गरेको र सिंहदरबारको अधिकारलाई गाउँसम्म पु¥याउनका लागि आफ्नो पार्टीले नै विशेष पहल गरेको भन्दै माओवादी केन्द्रले सोही एजेन्डालाई नै जनताको माझमा लैजाने तयारी गरेको सो पार्टीका नेता मणि थापाको भनाइ छ ।

नेता थापाले मुलुक माओवादीको एजेन्डामा अगाडि बढेका कारण आफूहरुले आफ्नै एजेन्डालाई नै जनताको माझमा लैजाने र मत माग्ने उल्लेख गर्नुभयो ।

विभिन्न जिल्लामा पार्टीको गाउँ सम्मेलन, जनवर्गीय सङ्गठनको सम्मेलन तथा उम्मेदवार चयनको काम जारी छ । प्रदेशस्तरमा प्रदेश इन्चार्जले नै आमसभा, जनसभा गर्ने गरी कार्यक्रम तोकिएका छन् भने केन्द्रीयस्तरबाट ठूला आमसभा आयोजना गर्ने वा नगर्ने भन्ने बारेमा कुनै निर्णय गरिएको छैन ।

‘‘स्थानीय माग र आवश्यकतालाई केन्द्रमा राखेर कार्यक्रम तय गरिएको छ । ठूला कार्यक्रमभन्दा पनि स्थानीय विषय र प्राथमिकता नै हाम्रो पार्टीको प्रमुख एजेन्डा हो । यद्यपि स्थानीय तहबाट आउने मागका आधारमा ठूला कार्यक्रम पनि हुन सक्छन्’’ – प्रवक्ता भुसालको भनाइ छ ।

आगामी वैशाख १६ गते मनोनयनपत्र दर्ता गराउनुपर्ने निर्वाचन आयोगको कार्यतालिकाअनुसार माओवादी केन्द्रले उम्मेदवार छनोटको तयारी तीव्र पारेको जनाएको छ ।

माओवादीले अहिलेसम्म चारवटा नगरपालिकाको मेयर र उपमेयरको टुङ्गो लगाएको छ । केही ठाउँमा उम्मेदवार छान्ने क्रमलाई समेत अन्तिम रुप दिएको छ ।

उम्मेदवार छनोटका लागि माओवादीले बनाएको कार्यविधिअनुसार उम्मेदवारका लागि सम्बन्धित समितिले मतदाता नामावलीमा नाम समावेश भएका प्रमाणसहित माथिल्लो कमिटीमा पठाउनुपर्नेछ ।

त्यस्तै नगरपालिका, गाउँपालिका र उपमहानगरपालिकाको लागि सम्बन्धित प्रदेशको स्वीकृति अनिवार्य हुनुपर्नेछ भने महानगरपालिकाका लागि पार्टी केन्द्रले नै उम्मेदवारको टुङ्गो लगाउने कार्यविधिमा उल्लेख छ ।

माओवादीले हेटौँडा उपमहानगरपालिकाको मेयरमा केन्द्रीय सदस्य बलराम बल र उपमेयरमा कमला पौडेललाई चयन गरेको छ । यस्तै विराटनगर उपमहानगरपालिको मेयरमा केन्द्रीय सदस्य भोगेन्द्र यादव र उपमेयरमा नगर अध्यक्ष नमिता न्यौपाने, वीरेन्द्रनगर नगरपालिका, सुर्खेतको मेयरमा रत्न गाहा र उपमेयरमा हरिमाया शर्मालाई उम्मेदवार बनाइसकेको छ ।

अन्य जिल्लाको समेत केही दिनभित्रै उम्मेदवारको नाम सार्वजनिक गरिने जानकारी दिँदै माओवादी केन्द्रले आफूहरु निर्वाचनमा पूर्णरुपमा होमिएको जनाएको छ ।

स्थायी समिति सदस्य पुष्पविक्रम मल्लका अनुसार गाउँ गाउँमा चुनावी माहोल बन्दै गएको र मतदाता पनि लामो समयपछि हुन लागेको स्थानीय तहको निर्वाचनमा भाग लिन उत्सुक छन् ।

आफूहरुले जनतालाई नै केन्द्रमा राखेर निर्वाचन अभियान अगाडि बढाएको र उत्साह बढ्दै गएको नेता मल्लले जानकारी दिनुभयो । रासस