सिंहदरबार पस्दै प्रधानमन्त्री देउवाले कार्यभार सम्हाले, यस्ता गरे पहिला दुई निर्णय

राजनीति

काठमाडौं, २४ जेठ । प्रधानमन्त्री शेरबहादुर देउवाले जिम्मेवारी सम्हाले लगत्तै दुई निर्णय गरेका छन् । उनले ‘प्रदेश समन्वय समितिको सचिवालय’ प्रधानमन्त्रीको कार्यालयमा राख्ने निर्णय सदर गरेका छन् । अब प्रधानमन्त्री कार्यालयमा एक महाशाखाको रुपमा त्यस्तो परिषदको सचिवालय गठन हुनेछ ।

त्यस्तै सदाचारसम्बन्धी नीति बनाउने मस्यौदामा पनि हस्ताक्षर गरेका छन् । नेपालको ४० औँ प्रधानमन्त्री बनेका कांग्रेस सभापति शेरबहादुर देउवा चौथो पटक प्रधानमन्त्री बनेका हुन् । व्यवस्थापिका संसदमा मंगलबार भएको चुनावमा ३ सय ८८ जना सांसदको समर्थनमा देउवा प्रधानमन्त्री बनेका हुन् ।

बुधबार प्रधानमन्त्री शेरबहादुर देउवासँगै सात मन्त्रीहरुले सपथ लिएका छन् । उपप्रधानमन्त्रीमा कांग्रेसका गोपालमान श्रेष्ठले शिक्षा, माओवादी केन्द्रका कृष्णबहादुर महराले परराष्ट्र र नेपाल लोकतान्त्रिक फोरमका विजयकुमार गच्छदारले स्थानीय विकास मन्त्रालयको जिम्मेवारी सम्हालेका छन् ।

चार जना मन्त्रीमा कांग्रेसका ज्ञानेन्द्रबहादुर कार्कीले अर्थ, फर्मुल्लाह मन्सुरले श्रम तथा रोजगार माओवादी केन्द्रका जनार्दन शर्माले गृह मन्त्रालयको जिम्मेवारी सम्हालेका छन् । माओवादी केन्द्रकै प्रभु शाह बिना विभागीय मन्त्री भएका छन् ।