भारत र पाकिस्तानका प्रधानमन्त्रीबीच १७ महिनापछि भेटवार्ता

विश्व प्रवास

- रासस

काठमाडौं, २६ जेठ । भारत र पाकिस्तानका प्रधानमन्त्रीबिच १७ महिनापछि भेटवार्ता भएको छ । गएको १७ महिनापछि पहिलो पटक कजाकिस्तानमा भेट भएको हो । काश्मिर भूभागका कारण यी दुई देशका बिचमा राम्रो सम्बन्ध रहने गरेको छैन । तर गएको केही समययतादेखि काश्मिरमा उत्पन्न नयाँ विवादसँगै उहाँहरुबिच कजाकिस्तानमा भेट भएको समाचारमा जनाइएको छ ।

भारतीय प्रधानमन्त्री नरेन्द्र मोदी र पाकिस्तानी प्रधानमन्त्री नवाज शरिफबिच बिहीबार साँझ कजाकिस्तानमा भेट भएको दुवै
जनाले हात मिलाउदै एक आपसमा अभिवादन गरेका थिए । उहाँहरु कजाकिस्तानमा जारी सांघाई कोअपरेशन फोरममा सहभागिताका लागि त्यहाँ रहनुभएको छ ।

उहाँहरुबिच यसअघि सज् २०१५ को डिसेम्बर महिनामा जलवायु परिवर्तनसम्बन्धमा फ्रान्सको राजधानी पेरिसमा भएको सम्मेलनका क्रममा भेटवार्ता भएको थियो । भारतीय विदेशमन्त्रालयका एकजना अधिकारीले उहाँहरुबिच वार्ता भने नभएको र उक्त सम्मेलनको उद्घाटनका क्रममा भेट र हात मिलाउने काममात्र भएको जनाएका छन् ।

सन् २०१६ को जनवरी महिनामा भारतीय भूभाग पठानकोटमा रहेको भारतीय सैनिक क्याम्पमा भएको भिषण आतंककारी हमलापछि यी दुई देशबिचमा लामो विवाद उत्पन्न हुदै आएको छ । हमलामा पाकिस्तान संरक्षित आतंककारीको हात रहेको आरोप भारतले लगाउँदै आएको छ । तर पाकिस्तानले भने यसको कडा रुपमा खण्डन गर्ने गरेको छ ।

भारत र पाकिस्तानबीच हुने गरेको शान्ति वार्ता पनि भारतीय पक्षका कारण स्थगित हुदै आएको छ । जसका कारण पछिल्ला केही वर्षयतादेखि यी दुई देशबिच औपचारिक वार्ताहरु पनि रोकिएका छन् ।