१० तलामाथिबाट खसालेको बच्चा तल रहेका व्यक्तिले समात्न सफल

विश्व प्रवास

- बिबिसी

काठमाडौं, १ असार । भीषण आगलागी भएको लण्डनको ग्रेनफेल टावरबाट खसालिएको एक बच्चालाई एक व्यक्तिले समात्न सफल भएका छन् । लण्डनको पश्चिमी क्षेत्र लाटिमर रोडमा रहेको २७ तले ग्रेनफेल टावरमा बुधबार आगलागी भएको थियो । आगलागी भएका बेला टावरको नवौं वा दशौं तलामा रहेकी एक महिलाले आफ्नो बच्चालाई तल खसालेको र तल रहेका एक व्यक्तिले बच्चालाई समात्न सफल भएको प्रत्यक्षदर्शी समिरा लामरानीले बिबिसीलाई बताईन् ।

उनका अनुसार आगलागी भएको टावरमा रहेकी महिलाले तल रहेका मानिसको भिडलाई आफूले बच्चा खसाल्न थालेको संकेत गरेकी थिइन् । त्यसपछि उनले आफ्नो बच्चा खसालेको र भिडमा रहेका एक व्यक्ति दौडेर गइ बच्चालाई समात्न सफल भएको उनको भनाई छ ।

लामरानीले भनिन्, ‘ती महिला नवौं वा दशौं तलामा थिइन् । झ्याल आधा खुलेको थियो । महिलाले आफ्नो बच्चा खसाल्न खोजेको संकेत गरिन् । मानिसको भिडमा रहेका एक व्यक्ति अघि बढे । अनि ति महिलाले बच्चालाई तल खसालिन् । तल रहेका व्यक्तिले बच्चालाई सकुशल समात्न सफल भए ।’