अमेरिकामा बन्दुकले हरेक वर्ष १३ सय बालबालिकाको ज्यान लिँदै

विश्व प्रवास

काठमाडौं, ६ असार । अमेरिकामा बन्दुकका कारण हरेक वर्ष कम्तिमा १३ सय बालबालिकाले ज्यान गुमाउने गरेको पाईएको छ । नयाँ अध्ययन अनुसार अमेरिकामा बन्दुकका कारण हुने चोटले १७ वर्षमुनिका कम्तिमा १३ सय बालबालिकाले ज्यान गुमाउने गरेको अमेरिकी सरकारले जनाएको छ ।

यस्तै बन्दुका कारण हरेक वर्ष झण्डै ५८ सय जना गम्भीर घाइते हुने गरेको अमेरिकाको सेन्टर फर डिजिज कन्ट्रोल एण्ड प्रिभेन्सन (सिडिसी) ले गरेको अध्ययनमा देखिएको हो । गोली लागेर ज्यान जानेमा ८२ प्रतिशत बालक छन् । यस्तै बन्दुकका कारण ज्यान गुमाउने खतरामा कालो वर्णका बालबालिका धेरै छन् ।

बन्दुकका कारण हुने मृत्युमा आधा भन्दाबढी हत्या हो भने ३८ प्रतिशत आत्महत्या रहेको छ । अमेरिकामा हरेक दिन कम्तिमा १९ जना बालबालिकाको गोली लागेर ज्यान जाने वा गम्भीर चोटग्रस्त हुने गरेको प्रतिवेदनमा उल्लेख छ ।

सन् २००७ देखि २०१५ सम्मको तथ्यांक हेर्दा बन्दुक प्रयोग गरेर आत्महत्या गर्ने दर ६० प्रतिशतले बढेको छ । गएको आइतबार पेन्सिलभेनियाका चार वर्षका बालकले आफ्नो अनुहारमा गोली हानेर उनको ज्यान गएको थियो । त्यसपछि नयाँ प्रतिवेदन सार्वजनिक गरिएको हो ।