आइएसको आक्रमणबाट इराकको मोसुलस्थित ऐतिहासिक अलनूरी मस्जिद ध्वस्त

विश्व प्रवास

काठमाडौं, ८ असार । आइएसको आक्रमणबाट इराकको मोसुलस्थित ऐतिहासिक अल–नूरी मस्जिद ध्वस्त भएको छ । सन् २०१४ मा आइएसका नेता अबू बक्र अल–बगदादीले शरण लिएको मस्जिदलाई आइएसले ध्वस्त पारेको इराकी सेनाले जनाएको छ । तर आइएसले यो मस्जिद एक अमेरिकी लडाकू विमानबाट गरिएको हमलामा नष्ट भएको दाबी गरेको छ ।

अमेरिकी सेनाले भने आइएसको भनाइलाई अस्वीकार गरेको छ । आकाशबाट लिइएको तस्बिरमा यो मस्जिदको अधिकांश हिस्सा नष्ट भएको देखाइएको छ । मोसुललाई आफ्नो नियन्त्रणमा लिन अघि बढेको इराकी सेनाका कमान्डर मेजर जनरल जोसेफ मार्टिनले आफूहरु मस्जिदबाट करिब ५० मिटर टाढा पुगेका बेला आइएसले अर्को एक गम्भीर अपराध गरेको बताए ।

उनले आइएसले मस्जिद ध्वस्त बनाएर मोसुलसहित सबै इराकीविरुद्ध अपराध गरेको आरोप लगाए । आइएसका यस्ता क्रियाकलापले पनि यो संगठन असभ्य रहेको र यसलाई परास्त गर्नुपर्ने उनको भनाइ थियो ।

यसैबीच इराकका प्रधानमन्त्री हैदर अल अबादीले मस्दिज ध्वस्त पारेर आइएसले आफ्नो हार स्वीकार गरेको बताएका छन् । यो मस्जिद सन् ११७२ मा निर्माण गरिएको थियो । आइएसले यसअघि इराक र सिरियाका केही महत्वपूर्ण स्थल पनि ध्वस्त पारिसकेको छ ।