बलात्कारको उजुरी गर्न जाँदा उल्टै प्रहरीद्धारा नै ‘सेक्स प्रस्ताव’

विश्व प्रवास

काठमाडौं, ११ असार । बलात्कारको उजुरी गर्न जाँदा उल्टै प्रहरीले सेक्स प्रस्ताव राखेको घटना बाहिरिएको छ । दुई महिना अघि भारतको उत्तर प्रदेशकी एक ३७ वर्षीया एक महिला दुई पुरुषको बलात्कारको शिकार बनिन् । आफ्नै गाउँका दुई पुरुषले बलात्कार गरेको उजुरी प्रहरीकहाँ दिँदा उल्टै प्रहरीले यौन प्रस्ताव राखेको आरोप लगाएकी छन् । जुन घटना अहिले भारतभर निकै चर्चामा रहेको छ ।

आफूमाथि बलात्कार भएको गुनासो गर्दै प्रहरी कार्यालय पुगेकी उनलाई प्रहरी अधिकारी जईप्रकाश सिंहले सेक्स प्रस्ताव गरेका थिए । ‘सिंहले मेरो इच्छा पूरा गरे मात्र यौन दुव्र्यवहारबारे अनुसन्धान हुने बताए,’ उनको भनाइ उद्धृत गर्दै बेलायतको डेली मेलले लेखेको छ ।

गत फेब्रुअरी महिनाको एक साँझ लिफ्ट दिने बहानामा उनलाई ५५ वर्षीय अमिर अहमेद र ४५ वर्षीय सतार अहमेदले बलात्कार गरेका थिए । उनले तत्कालै आफूलाई बलात्कार गर्ने स्थानीय दुई व्यक्तिको नाम दिएरै बारम्बार उजुरी दर्ताको प्रयास गरिन्, तर सिंहले मानेनन्, बरू उनलाई फोन गरेर गोप्य स्थानमा भेट्ने प्रस्ताव गरे । प्रहरीको आचरणलाई लिएर महिलाले गुनासो गर्न थालेपछि सिंहले उजुरी गर्ने म्याद गुज्रिसकेको बताए ।

तर, सिंहले ती महिलालाई फोनबाट दुव्र्यवहार गर्न भने छाडेनन् । सिंहले बारम्बार फोन गरेर महिलालाई भेट गर्न बोलाए । सिंहको व्यवहारबाट आजित भएपछि ती महिलाले ऊसँग भएका वार्तालापलाई रेकर्ड गरी प्रहरी प्रमुखलाई बुझाइन्, तर प्रहरीले विभिन्न बहानामा उनको मुद्दा पन्छायो । अन्ततः प्रहरी अत्याचारका विरुद्ध यसै साता उनी स्थानीय अदालतको ढोका ढकढक्याउन पुगेकी छिन् ।

भारतमा दिनहुँजसो कुनै न कुनै राज्यमा बलात्कारका घटना हुने गर्छन् । सन् २०१५ मा ३४ हजार महिला बलात्कृत भएका थिए । सन् २०१४ मा १५ हजार बालिका बलात्कृत भएका थिए । त्यस्तै, विवाहपछि हुने बलात्कारको तथ्यांक पनि धेरै रहेको बताइन्छ।