अफगानीस्तानमा आइएस प्रमुखसहित ७७ लडाकू मारिएको अमेरिकाको दाबी

विश्व प्रवास

- एजेन्सी

काठमाडौं, १ साउन । अफगानिस्तानका विद्रोही समूह इस्लामिक स्टेट (आईएस) प्रमुख अबु सयद मारिएको अमेरिकाले दाबी गरेको छ । पूर्वी प्रान्त कुनारमा अमेरिकी सेनाले गरेको कारबाहीमा सयद मारिएको दावी गरेको समाचार संस्था रोयटर्सले जनाएको छ । यस्तै अफगानिस्तानका विभिन्न ठाँउमा गरिएको सुरक्षा कारबाहीमा परी ७७ जना भन्दा बढी लडाकू मारिएको दावी छ ।

देशभरी गएको २४ घण्टाको अवधिमा भएका कारबाहीमा अन्य २७ जना घाइते पनि भएको खबर छ । ‘मृतक मध्ये १७ जना इस्लामिक स्टेट (आइएस) लडाकू रहेका छन् भने अरु सात जनालाई नियन्त्रणमा लिइएको छ’ अफगानी गृह मन्त्रालयले शनिबार जारी गरेको वक्तव्यमा उल्लेख छ ।

नान्गाहार, कुनार, नुरिस्तान, कपिसा, पाक्तीका, खोस्ट, लोगार, कान्दाहार, जाबुल, ओरुज्गान, कुन्दुज, फार्याब, ताखार र हेल्मन्ड प्रान्तमा सुरक्षा कारबाही चलाइएको सरकारी अधिकारीहरुको भनाई छ । उनीहरुको सुरक्षा कारबाहीका क्रममा केही हातहतियार तथा विस्फोटक पदार्थहरु पनि नियन्त्रणमा लिएर नष्ट गरेको जनाइएको छ ।