एमालेले निर्वाचित जनप्रतिनिधिका लागि ल्यायो यस्तो योजना, साउनभर प्रशिक्षण दिने

राजनीति

काठमाडौं, ३ साउन । नेकपा एमालेले आफ्नो पार्टीबाट निर्वाचित जनप्रतिनिधिलाई प्रशिक्षण दिने भएको छ । पहिलो र दोस्रो चरणको स्थानीय तह निर्वाचनमा एमालेको तर्फबाट निर्वाचित जनप्रतिनिधिहरुलाई प्रशिक्षण दिने भएको हो । एमालेले ६ वटै प्रदेशबाट निर्वाचित भएका जनप्रतिनिधिलाई साउन महिनाभर प्रशिक्षण दिने भएको हो ।

स्थानीय कमिटी बैठकले जनप्रतिनिधिलाई तालिम निर्णय गरे लगत्तै केन्द्रीय सचिवालय बैठकले प्रशिक्षणको मिति र विषयवस्तु तय समेत गरेको छ । मंगलबार केन्द्रीय कार्यालयमा महासचिव ईश्वर पोखरेलको अध्यक्षतामा बसेको बैठकले अभिमूखिकरण कार्यक्रम तय गरेको प्रचार विभाग प्रमुख योगेश भट्टराईले जानकारी दिए ।

एमालेले जनप्रतिनिधिलाई तालिम प्रदेश नम्बर ७ बाट शुरु गर्ने भएको छ । प्रदेश नम्बर १ मा साउन २३ र २४, प्रदेश नम्बर ३ मा साउन २७ र २८, प्रदेश नम्बर ४ मा साउन २७ र २८, प्रदेश नम्बर ५ मा साउन १० र ११ गते, प्रदेश नम्बर ६ मा साउन २९ र ३० गते र प्रदेश नम्बर ७ मा साउन ७ र ८ गते अभियमूखीकण कार्यक्रम आयोजना गरिने एमालेले जनाएको छ ।

सबै कार्यक्रमको व्यवस्थापन सम्बन्धित प्रदेश कमिटीहरुले गर्ने भट्टराईद्वारा जारी विज्ञप्तिमा उल्लेख छ । अभिमूखिकरण कार्यक्रममा स्थानीय तहका प्रमुख र उपप्रमुखहरु सहभागी हुनेछन् । तर, प्रमुख नजितेका ठाउँबाट उपप्रमुख र बष्ठितम वडाध्यक्षलाई सहभागी गराइने छ । प्रमुख र उपप्रमुख नजितेका स्थानीय तहबाट दुई वडाध्यक्ष सहभागी हुनेछ ।

कार्यक्रममा पार्टीका जिल्ला अध्यक्षहरु, स्थानीय निकाय बिभागका प्रमुखहरु, पार्टीका जिल्ला इन्चार्जहरु र सम्बन्धित प्रदेशका सांसदहरु समेत सहभागी हुनेछन् । अभिमूखीकरण कार्यक्रममा स्थानीय तहको वित्त व्यवस्थापन, विकास निर्माण, स्रोत परिचालन, कानुनी प्रबन्धलगायत राजनीतिक दायित्वहरूका बारेमा विषय विज्ञसहित पार्टी नेताहरूले प्रशिक्षण दिने एमालेले जनाएको छ ।