विप्लव पार्टीले भ्रष्टाचारीहरुको सूची सार्वजनिक गर्दै जनकारबाही गर्ने

प्रदेश

पोखरा, २४ असोज । नेत्रविक्रम चन्द विप्लव नेतृत्वको नेकपाको पाँचौं पूर्ण गोप्य बैठक पोखराको लुम्लेमा सम्पन भएको छ । बैठकले पार्टी महासचिव विप्लपद्वारा प्रस्तुत क्रान्तिकारी ध्रुवीकरणलाई तीव्र पार्नेसहितको ८ पृष्ठ लामो राजनीतिक प्रस्ताव पारित गरेको छ ।

बैठकले नेकपा एमाले र माओवादी केन्द्रको गठबन्धनलाई ‘दक्षिणपन्थी’को संज्ञा दिएको छ । असोज २१ देखि २३ गतेसम्म भएको सो बैठकले आगामी कात्तिक १ गतेदेखि पार्टीको विशेष राजनीतिक अभियान सुरु गर्ने निर्णय गरेको पोलिटब्यूरो सदस्य अनिल शर्माले जानकारी दिए ।

भ्रष्टाचारीलाई कारबाही गर्नेसहितका निर्णयसमेत सो बैठकमा भएको जनाइएको छ । वैद्य माओवादीसँग तत्काल पार्टी एकीकरण हुने सम्भावना कम रहेको निष्कर्ष बैठकले निकालेको छ ।

नेकपाले सरकारद्वारा घोषित राज्यसभा र संसद्को चुनाव खारेज गर्ने औपचारिक निर्णय पनि गरेको छ । नेकपाले राष्ट्रिय स्तरका भ्रष्टाचारीको घर घेर्ने र ती भ्रष्टाचारीहरूको सम्पत्ति राष्ट्रियकरण गर्न दबाब दिने लगायतका निर्णय गरेको हो ।