अपडेटः कर्फ्युको अवज्ञा गर्दा प्रहरीको गोली लागेर दुई जनाको मृत्यु, दर्जनौं घाइते

प्रदेश

झापा, १० कात्तिक । झापामा प्रहरीको गोली लागेर दुई जनाको ज्यान गएको छ । बालकको मृत्यु प्रकरणबारे छानविन गर्न माग गर्दै निकालिएको र्‍यालीमा प्रहरीले गोली चलाउँदा अर्जुनधारा नगरपालिका ११ का नरेश थापा र एक अर्का युवाको ज्यान गएको हो । बिहानदेखि तनाव रहेको विर्तामोडमा स्थिति समान्य बनाउन जिल्ला प्रशासन कार्यालयले शुक्रबार दिउँसो साढे १ बजे देखि अनिश्चितकालसम्मका लागि लगाएको कर्फ्युमा परी थापा र अर्का पहिचान खुल्न नसकेका युवाको ज्यान गएको हो ।

कर्फ्यु लगाइएको समयमा कर्फ्यु तोडेर इलाका प्रहरी कार्यालय विर्तामोड तोडफोडमा गएका प्रदर्शनकारीमाथि प्रहरीले गोली हान्दा ३२ वर्षीय थापालाई लागेको थियो । गोली लागेपछि उपचारको लागि मेची अञ्चल अस्पताल लैजाँदै गर्दा उनको बाटैमा ज्यान गएको प्रहरीले जनाएको छ । उनको घाँटीमा गोली लाग‍ेको छ । उनको शव पोष्टमार्टमको लागि लगिएको छ ।

प्रहरीको गोलीबाट अन्य १० जना घाइते भएका छन् । उनीहरुको अवस्था गम्भीर रहेको प्रहरीले जनाएको छ । घाइतेमध्ये ४ जनाको बिएन्डसी मेडिकल कलेजमा, ४ जनाको मेची अन्चल अस्पतालमा र २ जनाको नजिकैको नीजि अस्पतालमा उपचार भइरहेको छ ।

स्थानीय प्रशासनले झापाको बिर्तामोडमा अनिश्चितकालीन कर्फ्यू आदेश जारी गरेपनि स्थानीयले कर्फ्यूको अवज्ञा गरेका छन् । बिरोध र्‍यालीमा प्रहरीले गोली प्रहार गरेपछि घटनाले उग्र रुप लिएको हो । उक्त घटना हिंसात्मक बन्दै गएपछि स्थानीय प्रशासनले अनिश्चित कालको लागि कर्फ्यू आदेश जारी गरेको हो । बिर्तामोडको मुक्तिचोकलाई केन्द्र मान्दै पूर्वमा बसपार्क छिर्ने बाटो, पश्चिममा चारपाने चोक, दक्षिणमा बिर्ताबजार र उत्तरमा महानन्दचोकसम्म अनिश्चितकालीन कर्फ्यू लगाइएको छ ।

अर्जुनधाराका ११ वर्षीय लक्ष्मण शिवाकोटीको मृत्युको सत्यतथ्य छानविन मागसहित सुरु भएको आन्दोलनले उग्र रुप लिएको छ । आन्दोलनकारीको समूहले बिर्तामोड नगरपालिका मेयर ध्रुव शिवाकोटीको निजीमा गाडी तोडफोड गरेका छन् । उनको घरमा समेत ढुंगामुढा प्रहार भएको छ । यस्तै, जिल्ला ट्राफिक प्रहरी कार्यालयमा पनि तोडफोड भएको छ । कार्यालय परिसरमा राखिएको पूर्वसांसद् प्रेम गिरीको मोटरसाइकल पनि जलाइएको छ । आन्दोलनकारीले मुक्तिचोक आसपास जडान गरिएका सीसी क्यामेरा पनि फुटाएका छन् ।