एमाले पूर्व सभासद अर्वपति विनोद चौधरी कांग्रेसको समानुपातिक सूचीमा

प्रदेश

काठमाडौं, १३ कात्तिक । उद्योगपति विनोद चौधरी नेपाली कांग्रेसको समानुपातिक तर्फको बन्दसूचिमा परेका छन् । यसअघि २०६४ सालको संविधानसभा चुनावमा नेकपा एमालेबाट समानुपातिकतर्फको सांसद रहेका चौधरी अहिले कांग्रेसबाट समानुपातिक तर्फको बन्दसूचिमा परेका हुन् ।

फोर्ब्सको विश्वकै धनीहरुको सूचीमा परेका व्यापारी विनोद चौधरीलाई यो पटक कांग्रेसले आफ्नो हात पार्न सफल भएको हो । कांग्रेसले आइतवार राति निर्वाचन आयोगलाई बुझाएको अन्तिम नामावलीमा चौधरीको नाम समावेश गरिएको हो ।

चौधरी ०६४ सालको संविधानसभा निर्वाचनमा एमालेबाट समानुपातिक सभासद र ०७० मा एमालेबाटै नवलपरासीबाट प्रत्यक्षका लागि सिफारिस भएका थिए । तर, उनले त्यहाँ चुनाव लड्न चाहेनन् ।

यसपटक चौधरीको नाम समानुपातिक सूचीमा राखेको आफूले जानकारी पाएको कांग्रेस नेता डा. नारायण खड्काले जानकारी दिए । चौधरीलाई समानुपातिकको प्राथमिकता सूचीमा राखेकोमा कांग्रेसभित्रै असन्तुष्टि बढेको छ । पार्टीलाई चुनावका लागि आर्थिक सहयोग गर्ने आश्वासनपछि चौधरीलाई समानुपातिकमा राखिएको कांग्रेस स्रोतको भनाइ छ ।

एमालेभित्र माधव नेपाल निकट रहेका चौधरी केपी ओली शक्तिमा आएसँगै छाँयामा परेका थिए । एमाले नेता एवं पूर्व अर्थमन्त्री भरतमोहन अधिकारीका प्रिय रहेका चौधरीको कांग्रेस नेताहरुसँग पनि सुरु देखिनै निकट सम्बन्ध थियो । अहिले चौधरीलाई कांग्रेसमा ल्याउने महामन्त्री सशांक कोइरालाले विशेष पहल गरेका थिए । चौधरीले नेपालका विभिन्न उद्योगमा लगानी गरेका छन् ।